Qorǵanys mınıstri áskerdegi problemalardy ashyq aıtýǵa ýáde berdi

NUR-SULTAN. QazAqparat – Áskerdegi problemalarǵa arnalǵan brıfıngter turaqty túrde ótkizilip turady. Bul týraly QR Qorǵanys mınıstri Rýslan Jaqsylyqov málim etti, dep habarlaıdy QazAqparat tilshisi.

«Eki aptada bir ret buqaralyq aqparat quraldaryna arnalǵan resmı brıfıng ótkizýdi josparlap otyrmyz. Buǵan deıin osyndaı tártipte málimet berý qarastyrylmaǵan edi. Brıfıng barysynda jeke ózim, meniń orynbasarlarym jáne basqa da jaýapty ofıtserler tilshilerdiń kez kelgen suraǵyna jaýap beretin bolady. Neǵurlym ashyq bolsaq, soǵurlym túsinistik qalyptasady. Sondyqtan aldaǵy ýaqytta biz ótkizetin brıfıngige shaqyramyn», - dedi R. Jaqsylyqov Májiliste tilshilerdiń saýalyna jaýap bere otyryp.

Budan buryn habarlanǵandaı, búgin QR Qorǵanys mınıstri Rýslan Jaqsylyqov merzimdi áskerı boryshyn ótep júrgender arasynda óz-ózine qol jumsaý jaǵdaılaryna qatysty pikir bildirdi.

Budan buryn habarlanǵandaı, jaqynda Mańǵystaý oblysynda shekara qyzmetinde áskerı boryshyn ótep júrgen sarbaz óz-ózine qol jumsady .

Aıta keteıik, Prezıdent armııada ólim-jitimniń jıileýine baılanysty komıssııa qurýdy tapsyrdy.