Qorǵanys mınıstri Arystaǵy jarylys týrasynda: Barlyq nusqa tekserilýde

NUR-SULTAN. QazAqparat - QR Qorǵanys mınıstri Nurlan Ermekbaev Arys qalasyndaǵy jarylystyń sebepterin tergeý sharalary qashan aıaqtalatynyn aıtty, dep habarlaıdy QazAqparat tilshisi.

«Bizdiń paıymdaýymyzsha, tergeý amaldary shamamen bir aıdyń ishinde aıaqtalýy múmkin», - dedi mınıstr Parlament Senatynda tilshiler saýalyna jaýap bere otyryp.

«Keshe jarylys sebepterine qatysty Bas áskerı prokýrordyń orynbasary túsinik berdi. Atap aıtqanda, qyzmettik salǵyrttyq bolýy múmkin. Budan bólek, tez janatyn zattardyń órtenýi, elektr jelisiniń tuıyqtalýy sebepteri de qarastyrylýda», - dedi N. Ermekbaev.

Sonymen qatar mınıstr qasaqana órt qoıý áreketi de tekseriletinin atap ótti.

«Osy oraıda bul nusqalardyń eshqaısysyn joqqa shyǵara almaımyz. Sondyqtan Іshki ister mınıstrliginiń quramynda qurylǵan tergeý toby QR Bas áskerı prokýratýrasynyń baqylaýymen júrgiziletin tergeý óz nátıjesin beredi degen oıdamyn. Bul turǵyda kináli adamdar tıisti jazaǵa tartylady», - dedi Qorǵanys mınıstri.

Aıta keteıik, 3 shilde kúni Ortalyq kommýnıkatsııalar qyzmetinde QR Bas áskerı prokýratýrasynyń ókilderi Arystaǵy jarylystyń yqtımal sebepterin atady.