Qorǵanys salasy Ispanııada óndirilgen áskerı ushaqpen tolyqty
Almatyda Qorǵanys mınıstri, general-polkovnık Rýslan Jaqsylyqov Qarýly kúshterdiń avıatorlary men is-shara qonaqtaryn osy oqıǵamen quttyqtady.
Saltanatty mıtıngke Keńes odaǵynyń batyry, Halyq qaharmany, otstavkadaǵy avıatsııa general-maıory Toqtar Áýbákirov, Airbus Military eýropalyq kontserniniń ókili Elena Parıııa Martın, QR Qarýly kúshteriniń ardageri zapastaǵy polkovnık Vladımır Platoshın, áskerı-kóliktik eskadrılıanyń jeke quramy, Desanttyq-shabýyldaý áskerleriniń áskerı qyzmetshileri, azamattyq avıatsııa akademııasynyń stýdentteri jáne «Jas sarbaz» qozǵalysynyń tárbıelenýshileri qatysty.
Ushaq ekıpajynyń komandıri podpolkovnık Asylbek Jumabaev Qorǵanys mınıstri general-polkovnık Rýslan Jaqsylyqovqa Ispanııadan turaqty ornalasý pýnktine aman-esen kelgeni týraly baıandady.
Qorǵanys vedomstvosynyń basshysy is-sharaǵa qatysýshylardy aıtýly oqıǵamen quttyqtady.
– Zamanaýı, utqyr, joǵary tehnologııalyq armııa qashanda eldiń qaýipsizdigin qamtamasyz etý men qorǵanys qabiletin nyǵaıtýdyń kepili bolyp qala beredi. Búgin memlekettik qorǵanys tapsyrysy aıasynda biz jeke quramdy, aýyr júkterdi, tehnıkany tasymaldaýǵa, gýmanıtarlyq operatsııalar sheńberindegi tapsyrmalardy oryndaýǵa arnalǵan áskerı-kóliktik ushaq aldyq, – dedi general-polkovnık R. Jaqsylyqov.
Sondaı-aq, mınıstr Airbus Military kompanııasynyń ókilderine Ispanııanyń Sevılıa qalasyndaǵy avıatsııalyq daıarlyq ortalyǵynda qazaqstandyq mamandardy oqytýǵa belsendi qatysqany úshin alǵysyn bildirdi.
– Ushý jáne ınjenerlik-tehnıkalyq quram belgilengen merzimde avıatehnıkany basqarý men qyzmet kórsetýge qajetti teorııalyq qaıta daıarlaýdan ótti. Kontsern ókilderi bizge osyǵan qatysty qajetti tehnologııalyq aqparat berdi. Bolashaqta bizdiń mamandar oǵan óz betinshe qyzmet kórsetip, tıisti reglamenttik is-sharalardy júrgize alady, – dep tolyqtyrdy ol.
Aıta ketsek, Airbus Military avıajasaý kontsernimen ekijaqty yntymaqtastyq búginde elimizdiń Áskerı-áýe kúshterinde sátti paıdalanylyp júrgen S-295 ushaqtaryn satyp alǵan 2013 jyly jolǵa qoıylǵan bolatyn.
Sondaı-aq, áýe kemesiniń tehnıkalyq sıpattamalaryn da atap ótken jón. A-400M áskerı-kóliktik ushaǵy 37000 kg júkti tasymaldaýǵa qabiletti. Maksımaldy jyldamdyǵy saǵatyna 802 km. Al ushý bıiktigi – 12200 m, praktıkalyq qashyqtyǵy – 7870 km.