Qorǵanys mınıstrliginiń ushqyshtary Petropavl jáne Oral qalalaryna gýmanıtarlyq kómek jetkizdi
Búgin Áýe qorǵanysy kúshteri áskerı-kóliktik avıatsııasynyń bortymen Almatydan Oralǵa salmaǵy bes tonna gýmanıtarlyq júk jetkizildi. Al Petropavlǵa elordadan eki S-295 ushaǵy ushyp jetti. Olar sý apatynan zardap shekken turǵyndarǵa on tonna azyq-túlik, qajetti zattar men dári-dármekterdi tasymaldady.
Odan bólek ótken demalys kúnderi Astana qalasynan Atyraý oblysyna Áýe qorǵanysy kúshteriniń S-295 eki bortymen elordanyń kásipkerleri atynan on tonna gýmanıtarlyq kómek aparǵanyn atap ótken jón.
27 naýryz ben 15 sáýir aralyǵynda áskerı ushqyshtar 2 951 jergilikti turǵyndy, onyń ishinde 811 balany evakýatsııalady. Sý tasqynyna qarsy sharalarǵa jumylǵan qyzmetterdiń 998 ókilin jáne 165 tonnadan astam júkti jetkizdi.
Sý tasqyny jaǵdaıyn eskere otyryp, Qarýly kúshterdiń áskerı qyzmetshileri sý tasqyny saldaryn joıýǵa jáne apattan qutqarý jumystaryna qatysýdy jalǵastyryp jatyr.
Aqtóbe oblysynda Oıyl eldi mekeni mańynda áskerı ınjenerler parom arqyly sýdan ótýdi jolǵa qoıdy. Bul óńirge birneshe áskerı bólimderdiń, Áýe qorǵanysy kúshteri áskerı ınstıtýtynyń jáne aýmaqtyq qorǵanys brıgadasynyń jeke quramy jumyldyryldy.
Atyraý oblysynda áskerı qyzmetshilerdiń kúshimen Jaıyq ózeniniń arnasyn keńeıtý jáne Mahambet, Jańatalap, Talqaıran, Esbol, Eńbekshi, Aqqaıyń, Aqtoǵaı, Jalǵansaı, Qurylys, Inderbor jáne Órlik eldi mekenderiniń aýmaǵyn nyǵaıtý jumystaryn júrgizip jatyr. Mańǵystaý oblysynyń aýmaqtyq qorǵanys brıgadasy Qulsary qalasyndaǵy bógetti qalpyna keltirýge kómektesip júr.
Batys Qazaqstan oblysyna 66597, 18404, 61993 áskerı bólimderiniń jáne aýmaqtyq qorǵanys brıgadalarynyń áskerı qyzmetshileri jumyldyryldy. Oral qalasynyń «Kýrınyı» shaǵyn aýdanynyń jáne Býmakól jáne Rýbejınskıı eldi mekenderiniń boıymen aǵatyn Jaıyq ózeniniń jaǵalaýyn kúsheıtý jumystary júrgizilýde. Podstepnoe, Magıstralnoe, Baıqońys, Darınskoe, Býdarın, Jańabulaq jáne Chapaev aýyldaryndaǵy bógetter de nyǵaıtylyp jatyr.
Soltústik Qazaqstan oblysynda 68665 jáne 31775 áskerı bólimderiniń áskerı qyzmetshileri qapshyqtarǵa qum toltyryp, tósep jatyr. Bul jumystar «Qyzyljar sý» sý arnasynyń janynda jáne Beskól aýylynda júrgizilip jatyr.
27 naýryz ben 15 sáýir aralyǵynda is-sharalarǵa barlyǵy 5 441 áskerı qyzmetshi kómektesip, 211 birlik avtomobıl tehnıkasy, 11 tikushaq, 2 ushqyshsyz basqarylatyn qurylǵy jáne 5 áskerı-kólik ushaǵy jumyldyryldy. 469 myńnan astam qap daıyndalyp, tóseldi.