Qorǵanys mınıstri Sporttyq jáne jaýyngerlik sambo federatsııasyn basqarady
Qorǵanys mınıstrliginiń málimetinshe, saılaý Astanadaǵy Sporttyq jáne jaýyngerlik sambo federatsııasynyń kezekten tys otyrysynda ótti. Rýslan Jaqsylyqovtyń kandıdatýrasyna federatsııanyń barlyq múshesi biraýyzdan daýys berdi. Ol bul qyzmetke Aıdos Aqjanovtyń ornyna keldi.
Qoǵamdyq birlestiktiń jańa basshysy Rýslan Jaqsylyqov – dzıýdodan KSRO sport sheberi, birneshe dúrkin chempıon, sambo men dzıýdodan respýblıkalyq jáne halyqaralyq jarystardyń júldegeri.
– Federatsııa múshelerine nátıjeli jumysy men maǵan kórsetken senimi úshin alǵysymdy bildiremin. Sporttyq jáne jaýyngerlik sambo áskerı jáne quqyq qorǵaý qyzmetinde jeke quramdy daıarlaý júıesinde sátti qoldanylady. Biz sporttyń bul túrin, onyń ishinde áskerı-qoldanbaly sport retinde keń kólemde damytýǵa úlken kúsh salamyz, – dedi general-polkovnık Rýslan Jaqsylyqov.
Federatsııanyń jańa prezıdenti aldaǵy josparyn jarııalady.
– 2025 jyly sambo TMD-ǵa qatysýshy memleketter Dostyq armııalarynyń áskerı-sporttyq oıyndarynyń baǵdarlamasyna jáne Qazaqstan Qarýly kúshteriniń spartakıadasyna engiziledi. Sondaı-aq jastarǵa áskerı-patrıottyq tárbıe berý maqsatynda keshendi sporttyq is-sharalar, onyń ishinde QR Qorǵanys mınıstriniń kýbogyna sambodan ashyq respýblıkalyq týrnır ótkizý josparlanǵan. Baýyrjan Momyshuly atyndaǵy Almaty áskerı-sport kolledjinde sambo bólimshesin ashý josparda bar. Onda kóp balaly otbasylar, áskerıler men aýyl jastarynyń balalaryna artyqshylyq beriledi. Sporttyń bul túrin jappaı damytý maqsatynda Qarýly kúshter qataryna jaýyngerlik sambodan maman-nusqaýshylardy shaqyramyz, – dedi federatsııa prezıdenti.
Aımaqtyq federatsııalar da damıtyn bolady. Búginde 1100-diń ústindegi sektsııada qyryq myńnan astam adam sambomen shuǵyldanady.
Halyqaralyq sambo federatsııasyna kiretin federatsııa sporttyq jáne jaýyngerlik sambony jappaı damytýǵa, sondaı-aq qazaqstandyq sambısterdiń halyqaralyq jarystarda óner kórsetýiniń nátıjeliligine barynsha kúsh samaq.
Rýslan Jaqsylyqov áskerge barǵysy kelmeıtin jastarǵa syn aıtqanyn jazǵan bolatynbyz.