Qorǵaljyn aýdanyndaǵy et kombınatynyń ónimine suranys joǵary - Aqmola oblysy
Búgingi tańda Qorǵaljyn aýdanynda mal sharýashylyǵy qarqyndy damyǵan. Aýdanǵa jumys sapary barysynda oblys basshysy Qarashalǵy selolyq okrýgine qarasty «ELNUR Group» jaýapkershiligi shekteýli seriktestiginiń mal bordaqylaý alańdarynda boldy. Seriktestik basshysy Nurbaqyt Dosanbaevtyń aıtýyna qaraǵanda, osydan úsh jyl buryn 1 400 bas iri qaraǵa arnalǵan mal qorasy salynǵan. Keıin 2013 jyly «Sybaǵa» baǵdarlamasy arqyly angýst jáne gereford sıyrlary satyp alyndy. Qazirgi kezde sharýashylyqta iri qaradan basqa úıir jylqysy bar. Seriktestiktiń Astana qalasynda óz ónimderin satatyn fırmalyq dúkeni bar. Oǵan qosa, osy kúni sharýashylyq óz qarajaty esebinen mal soıý tsehynyń qurylysyn qolǵa alǵan. Óńir basshysy kásiporyn basshysynan mal azyǵy qory men et baǵasyn surap bildi. Osyndaǵy ıgi isterdi qolǵa alǵan kásipkerdiń jumysyna oń baǵasyn berip, Astana mańynda mal sharýashylyǵyn damytýdyń mańyzdylyǵyn atap ótti.
Osy kúni qorǵaljyndyqtardyń Elordany sapaly et jáne et ónimderimen qamtamasyz etip otyrǵany belgili. Ásirese, alty jyl boıy «Baqara» brendimen shyǵyp júrgen «Astana AgroProdýkt» seriktestigi et kombınatynyń et, shujyq tárizdi ónimderine tutynýshylar tarapynan suranys joǵary. Kásiporyn basshysy Serik Raqymovtyń sózine qaraǵanda, ótken jyly 2 577 tonna joǵary sapaly halal ónimi shyǵaryldy. Jyl basynan beri 1,7 myń tonnadan astam et óńdeldi.
- Bizdiń ónimderdiń sapasy joǵary. Ónim negizinen Astana, Almaty, Qaraǵandy tárizdi elimizdiń ózge de oblystarynda satylady,- deı kele Serik Raqymov eksport máselesiniń durys jolǵa qoıylǵanyn atap ótti.
- Biz ónimdi ózimizdiń brendtpen saýdaǵa shyǵaramyz. 2013 jyly alǵash ret Reseı Federatsııasyna 16 tonna etti eksportqa shyǵardyq. Qazirgi kezde Reseı qalalarynan kelgen kóterme saýda jasaýshylar etimizdi alyp ketedi.
Desek te, kásiporynda keıbir túıtkildi máseleler de joq emes. Máselen, kásiporynnyń aınalymdaǵy qarajaty tapshy kórinedi.
- Jaqynda Astanada bolǵanymda saýda oryndarynda ózimizdiń kásipkerlerdiń ónimderin baıqadym. Ásirese, «Rodına» agrofırmasy jáne Arshaly aýdandarynyń ónimderin kórip rıza boldym,- dep atap ótti oblys ákimi óz sózinde.
Osy oraıda, oblys basshysy aýdan ákimine atalǵan kásiporynnyń aınalymda jetispeı otyrǵan qarjy máselesin sheshý jolyn qarastyrýdy tapsyrdy. Aldaǵy 2017 jyly «Baqara» et kombınaty jobalyq qýaty 5400 tonnany baǵyndyrmaq. Al, «MET» jaýapkershiligi shekteýli seriktestiginiń polıkarbonattan jasalynǵan aýmaǵy 1,8 gektar 8 jylyjaıyna keletin bolsaq, munda jaqyn kúnderi alǵashqy ónimdi jınaý josparlanyp otyr. Seriktestik basshysy Temirhan Qońyrbaevtyń aıtýynsha, Astananyń aınalasynda azyq-túlik beldeýin júzege asyrý aıasynda qolǵa alynǵan jobanyń mańyzy zor. Qazir munda qyzanaq jáne qııar ósirilýde. Jylyjaı sharýashylyǵyndaǵy agrotehnologııalyq sharalardy qoldanýmen jaqyn tanysqan oblys ákimi kókónis ósirýde ekologııalyq taza ári sapaly ádiske oń baǵasyn berdi.