Qorǵa jarna aýdarmaǵandar zeınetaqysyz qala ma – mınıstrdiń jaýaby

<p>ASTANA. KAZINFORM &ndash; Eńbek jáne halyqty áleýmettik qorǵaý mınıstri Svetlana Jaqypova zeınetaqy jınaǵyna aqsha aýdarmaı jumys istep júrgen qazaqstandyqtardyń zeınetaqysy qalaı taǵaıyndalatynyn túsindirdi.</p>

Mınıstr S. Jaqypova Elektrondy eńbek naryǵy portalyn tanystyrý úshin BAQ ókilderimen «galstýksyz» kezdesý ótkizip, jýrnalısterdiń saýaldaryna jaýap berdi. Qoıylǵan suraqtardyń arasynda 1998 jyldan keıin eńbekke aralasqan, biraq zeınetaqy jınaǵyna birde-bir teńge aýdarmaǵan adamdardyń keleshegi týraly saýal boldy.

«Bazalyq zeınetaqy bárine kepildendirilgen, ıaǵnı bárine tólenedi. Eger ol azamattardyń biryńǵaı zeınetaqy qoryna aýdarǵan jarnalary, aýdarymdary bolmasa, memleket olarǵa da bazalyq zeınetaqy tóleýden bas tartpaıdy. Bazalyq túrde kómegin beredi. 1998 jyldan beri jarnasyn turaqty aýdaryp kele jatqan azamattar artylǵan somaǵa baspanasyn alyp, densaýlyǵyn túzep jatyr. Meniń aıtarym, jumysqa turǵan kezde eńbek shartyn jasaý kerek. Naqty túrde aýdarymdardy ýaqtyly aýdarylǵanyn qadaǵalaý kerek», - deıdi mınıstr.

Vedomstvo basshysy ásirese 1998 jyldan bastap qana eńbekke aralasqan azamattar zeınetaqy qoryna aılyǵynan jarna aýdarylýyn qatty qadaǵalaý qajettigin aıtady.

«Qazir zeınetke shyǵyp jatqan azamattardyń zeınetaqy mólsheri qoldanystaǵy norma boıynsha esepteledi. Al negizinen sekseninshi jyldary týǵan azamattarǵa jańa tásil engizilýi múmkin. Olardyń zeınetke shyǵýyna deıin áli ýaqyt bar ǵoı. Sondyqtan olar qazirden bastap jarnalardy turaqty aýdaryp otyrýy kerek», - dedi Svetlana Jaqypova.