Koreıanyń jańa bıligi Qazaqstanmen tyǵyz jumys jasaýǵa múddeli - Kım De Sık

ASTANA. QazAqparat - Astanadaǵy Qazaqstan - Koreıa iskerlik keńesiniń kezekti otyrysynda Ońtústik Koreıanyń Qazaqstandaǵy Tótenshe jáne ókiletti elshisi Kım De Sık óz eliniń jáne jańa prezıdenttiń ystyq sálemin jetkizdi, dep xabarlaıdy QazAqparat tilshisi. 

«Meniń Qazaqstanǵa elshi bolyp kelgenime úsh aı ǵana boldy. Degenmen, osy ýaqyttyń ishinde Qazaqstannyń biraz jetistikterge jetkenine kózim jetti. Nursultan Nazarbaev bolsa, osy jolda Ońtústik Koreıanyń tájirıbesi jaıynda ylǵı aıtyp otyrady. Qazaq xalqy da óte mádenıetti. Kóshede kele jatqanda menimen káris tilinde amandasatyndar kezdesedi. Shynymdy aıtsam, ondaıda tóbem kókke bir eli jetpeı qalady. Qazirgi kezde Koreıada jańa prezıdenttiń kelgenin jaqsy bilesizder. Prezıdentimizdiń jańa ákimshiligi Qazaqstanmen aradaǵy yntymaqtastyq baılanystardy kúsheıtýdi qalaıdy. Men bolsam, jańa elshi retinde osy jolda bar kúsh-jigerimdi salamyn», - deıdi Kım De Sık.

Elshiniń aıtýynsha, búginde munaı baǵasynyń qubylýyna baılanysty eki eldiń saýda-sattyǵy birshama baıaýlap qaldy.

«Degenmen, Qazaqstan tabıǵı resýrstarǵa baı el, taýar tasymaldaý jaǵynan geografııalyq ornalasaýy da tıimdi. Al Koreıada texnologııalar bar. Sondyqtan bizde ózara áriptestik ornatatyn salalar kóp. Bolashaqta yntymaqtastyq baılanystarymyzdy tereńdete alamyz», - dep atap kórsetti Sık myrza.

Aıta keteıik, búgin Astanada Qazaqstan - Koreıa iskerlik keńesiniń VI otyrysy bastaldy.

Otyrystyń basynda keńestiń teń tóraǵasy San-Ho Shın aǵynan jarylyp, káris kásipkerleriniń qazaq jerinde jumys istegisi keletinin jetkizdi. Onyń oıynsha, da Qazaqstanda bıznes úshinjaqsy jaǵdaı jasalǵan.