Koreıanyń tanymal ánshileri elordada óner kórsetti

NUR-SULTAN. QazAqparat – Qazaqstandaǵy Koreıa elshiligi men elordadaǵy koreı mádenı ortalyǵynyń qoldaýymen «Qazaqstan»ortalyq kontsert zalynda «Sálem! K-Pop Festa» kontserti ótti, dep habarlaıdy QazAqparat.

Kontsertke qazaqstandyq jastar arasynda tanymaldyqqa ıe K-Pop ártisteri shaqyryldy. Shara K-Pop mýzykalyq janry men koreı mádenıetiniń artyqshylyqtaryn nasıhattaıdy.

Kontsert bastalar aldynda QR Mádenıet jáne sport mınıstri Dáýren Abaev pen Ońtústik Koreıanyń Qazaqstandaǵy elshisi Ký Hongsok sóz sóılep, eki el arasyndaǵy mádenı qarym-qatynastyń keń qanat jaıyp kele jatqany týraly aıtty.

«Bıylǵy jyly Koreıa Respýblıkasy men Qazaqstan arasyndaǵy dıplomatııalyq qatynastardyń ornaǵanyna 30 jyl toldy. Sondaı-aq eki memleket arasyndaǵy mádenı almasý jylyn bildiretin alǵashqy resmı is-sharany ótkizý óte mańyzdy dep sanaımyn», - dedi Ký Hongsok myrza.

Óz kezeginde sóz alǵan Dáýren Abaev Qazaqstan men Koreıa arasyndaǵy mádenı qarym-qatynas odan ári damı beretindigine senim bildirdi jáne Qazaqstanda K-Pop janry óte tanymal ekenin tilge tıek etti.

Kontsertte óziniń tamasha vokaldyq qabiletimen tanymal ánshi Bek Djı En, Qazaqstanda tanymal koreı serıaldarynyń saýndtrekterin oryndaǵan, áıgili koreılik VIVIZ áıelder toby, sondaı-aq «Astana EKSPO-2017» kórmesine kelgen K-Pop highlight toby óz ónerlerin kórsetti.