Koreıalyq dárigerler shymkenttik naýqastardy qabyldady

ShYMKENT. QazAqparat - Ońtústik Koreıalyq dárigerler Shymkentke kelip, áriptesterimen tájirıbe almasty. Ýrologııa boıynsha álemge tanymal professorlar - Kım Dje Hon men Kım En Djın oblystyq aýrýhanada naýqastardy qabyldap, tegin keńester berdi, dep habarlaıdy QazAqparat tilshisi.

Sheteldik delegatsııany bastap kelgen professorlar Seýldegi Sýnchonhıan medıtsınalyq ortalyǵynda naýqastardy emdeıdi. Buǵan deıin almatylyqtarǵa tegin keńes bergen olar erler arasyndaǵy nesep joldary men  prostatıt jáne adenoma dertiniń dendeýiniń aldyn alady. Mamandardyń pikirinshe, bul aýrýlar er azamattarǵa  salaýatty ómir saltyn ustanbaýdan, kompıýterdiń aldynda uzaq otyryp, jumys isteý men dene qımylynyń azdyǵynan asqynady dep otyr.

«Sýnchonhıan medıtsınalyq ortalyǵynyń dárigerleri  eki jyldan beri qaıyrymdylyq sharalaryn júrgizip jatyrmyz.  Bul - úshinshi kelýimiz. Jer-jerdi aralap, naýqastarǵa tegin keńes beremiz. Bul joly 4 dáriger shymkenttik áriptesterge sheberlikti shyńdaý dáristerin ótkizýge keldik»,- deıdi Kım Dje Hon.

Aıta keteıik, ótken jyly Ońtústik Qazaqstan oblystyq densaýlyq saqtaý basqarmasy men Ońtústik Koreıalyq dárigerler arasynda ekijaqty memorandým jasalǵan bolatyn. Qujat boıynsha byltyrdyń ózinde ońtústikqazaqstandyq 6 dáriger Koreı eline baryp, biliktiligin arttyryp keldi. Al, bıyl taǵy 8 dáriger Seýlge jol tartpaqshy.

«Koreıaǵa baryp, oqyp kelgen 6 dáriger ótken jyldan beri  17 ret ota jasady. Zamanaýı tehnologııany paıdalana otyryp, byltyr alty operatsııa sheteldik professorlardyń qatysýymen jasaldy. Endi úırenip kelgendirin sheteldik mamandarsyz-aq ózderi jasap jatyr»,- deıdi oblystyq klınıkalyq aýrýhananyń bas dárigeri Marat Pashımov.