Koreıada 3 jyl ishinde 40 myńǵa jýyq adam ózine qol jumsaǵan

<p>Keıingi 3 jylda Ońtústik Koreıada 40 myńǵa jýyq koreıalyq sýıtsıd jasaǵan, sondaı-aq jastar arasynda ózin-ózi óltirgender sany artqany baıqalady. Kazinform bul týraly The Korea Herald basylymyna silteme jasap habarlaıdy.</p>

Koreıanyń Densaýlyq saqtaý mınıstrligi men Aýrýlardy baqylaý jáne aldyn alý agenttiginiń málimeti boıynsha, 2020-2022 jyldar aralyǵynda 39 453 adam ózine qol jumsaǵan.

Bul kórsetkish sol aralyqta bolǵan COVID-19-dan qaza tapqandar sanynan asyp tústi. Pandemııa kezinde 32156 ólim tirkelgen bolatyn.

Koreıada keıingi bes jylda jalpy sýıtsıd sany tómendedi. 2018-2022 jyldar aralyǵynda 100 myń adamǵa shaqqanda 28,6-dan 25,2-ge deıin azaıdy. Degenmen jasóspirimder men jastar arasynda artyp jatyr.

Ózine qol jumsaý kórsetkishi jasóspirimder arasynda 100 myń adamǵa shaqqanda 2018 jyly 5,8 bolsa, 2022 jyly 7,2-ge jetken. Al 20-29 jas aralyǵyndaǵy adamdarda sol kezeńde 17,6-dan 21,4-ke kóbeıdi.