Koreıa Respýblıkasynda Qazaqstan táýelsizdiginiń 30 jyldyǵyna arnalǵan markalar shyǵaryldy

NUR-SULTAN. QazAqparat - Koreıa Respýblıkasyndaǵy Qazaqstan Elshiligi men qabyldaýshy memlekettiń eń iri «Korea Post» poshta operatorynyń birlesken jumysynyń nátıjesinde táýelsizdigimizdiń 30 jyldyǵyna arnalǵan mereıtoılyq markalar jaryq kórdi.

Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.

Markalardyń bir bóligi saltanatty túrde Koreıa Respýblıkasyndaǵy jalǵyz Marka murajaıynyń jınaǵyna tabystaldy. Murajaı dırektory Na Sang-kýk atap ótkendeı, jańa eksponattyń arqasynda kóptegen kelýshiler Qazaqstan mádenıetin bilip, onymen jaqynyraq tanysýǵa qyzyǵýlary múmkin.

Osy jyldar ishinde murajaı mádenıet, dástúrler, iri ulttyq jáne halyqaralyq is-sharalardy qamtıtyn ár túrli taqyryptarǵa arnalǵan kóptegen kórmeler ótkizdi.

Murajaı qoryndaǵy eń «jasy úlken» bolyp 1884 jyly shyǵarylǵan Choson áýletiniń markasy eseptelse, al eń jasy kishisi - Qazaqstan Táýelsizdiginiń 30 jyldyǵyna arnalǵan markasy bolyp tabylady.