Koreıa men Qazaqstannyń mádenı almasý jylyna arnalǵan kontsert ótedi

ALMATY. QazAqparat – 23 qyrkúıek senbi kúni saǵat 18.00-de «Almaty» teatrynda Ońtústik Koreıa mádenıet jáne sport mınıstrligi men halyqaralyq mádenı almasý qory úıymdastyrǵan Koreı ulttyq orkestriniń kontserti ótedi, dep habarlaıdy QazAqparat.

Atalǵan kontsert Koreıa men Qazaqstan ózara mádenı almasý jylyna oraılastyrylǵan jáne eki eldin dostyǵyn nyǵaıtýǵa arnalǵan shara bolmaq.

Bul kontsertke Koreıa ulttyq orkestriniń dırıjeri Lı Syng Hvon, Koreıadan kelgen pansorı ánshisi jáne Qazaqstan dombyrashylary qatysady. Kesh 100 mınýtqa sozylady dep josparlanǵan.

Birinshi bólimde jeke dombyrashy «Meıram» taqyrybyna arnalǵan qazaqtyń halyq ánin, koreı orkestriniń súıemeldeýimen Qazaqstannyń halyq kompozıtory Erkesh Shákeevtiń, Berlın sımfonııalyq orkestriniń bas dırıjeri Lıor Shambadaldyń jetekshiligimen álemdik sahnada tanylǵan qazaqtyń klassıkalyq «Muqalı» kúıin oryndaıdy. Ekinshi bólimde koreı pansorıi jáne dástúrli orkestriniń súıemeldeýimen «Sacholga» jáne «Sýgýn hvaneng» ánderi shyrqalady.

Eki el arasyndaǵy mádenı baılanystyń mańyzdylyǵyn pash etý maqsatynda kontserttik keshte qazaqtyń dástúrli mýzykalyq aspaptary men koreıdiń sımfonııalyq mýzykasynyń úılesimi kórsetiledi.

«Bul qoıylym Koreıa men Qazaqstannyń sońǵy 30 jyl ishinde mádenı almasý arqyly dostyq ornatqanyn pash etedi jáne eki eldiń mýzykanttary oryndaıtyn ásem áýender men úılesimdilikten lázzat alatyn ýaqyt bolmaq. Biz kóp adam qyzyǵýshylyq bildirip, osy sharaǵa qatysady dep kútemiz», - dep atap ótti joba uıymdastyrýshylarynyń biri Chon Hıang Mı.

Іs-sharaǵa kirý tegin jáne oǵan 8 jastan asqandar qatysa alady. Bıletterdi 28 tamyzdan bastap Ticketon (https://ticketon.kz) saıtynan onlaın brondaýǵa bolady.