Koreıa Qazaqstanmen ónerkásipti damytý tájirıbesin bóliskisi keledi

ASTANA. QazAqparat – Qazaqstan strategııalyq zertteýler ınstıtýty men Koreıa Respýblıkasynyń elshiligi ónerkásip pen ekonomıkany damytýdaǵy yntymaqtastyq máselelerin talqylady, dep habarlaıdy QazAqparat.

«Sońǵy 10 jylda elimizdiń ekonomıkasy naqty mánde 36,4% ósti. Degenmen, barlyq ishki resýrstar, paıdaly qazbalar jáne bos jerler áleýetin eskersek, odan da kóp nárse jasaýǵa bolar edi. Qazaqstannyń agroónerkásipti, munaı hımııasyn damytýda, sırek kezdesetin metaldardy óńdeýde eleýli múmkindikteri bar. Aldyńǵy qatarly álemdik standarttarǵa shyǵý úshin ǵylymnyń, adamı kapıtal men tehnologııanyń damýy sıntezine kóńil bólýimiz kerek», - dedi QSZI dırektory Erkin Tuqymov «Koreıa ónerkásibin damytý tájirıbesin Qazaqstannyń bolashaǵyn paıymdaýda qoldaný múmkindikteri men shekteýleri» semınarynda.

Onyń aıtýynsha, Qazaqstanda Ońtústik Koreıa kapıtalynyń qatysýymen 500-ge jýyq birlesken kásiporyn jumys isteıdi.

«Bizdiń elderimiz arasynda jalpy somasy 4,5 mlrd bolatyn 58 birlesken ınvestıtsııalyq joba bar. Koreıa – Qazaqstannyń mańyzdy seriktesi, eń iri 5 saýda seriktesiniń qatarynda jáne ınvestıtsııalar kólemi boıynsha 6-orynda tur. Ótken jyldyń qorytyndysy boıynsha eki el arasyndaǵy taýar aınalymy 6 mlrd dollardan asty. Bul 2021 jylmen salystyrǵanda eki eseden astam (231%) ósýdi kórsetedi», - dedi E. Tuqymov.

Instıtýt basshysy eki eldiń jetekshi taldaý ortalyqtary arasyndaǵy berik saraptamalyq dıalog ekonomıka men memleketaralyq qatynastardyń damýyna yqpal etetinin jetkizdi.

Óz kezeginde Koreıa Respýblıkasynyń Qazaqstandaǵy elshisi Chjo Te-ık Koreıanyń materıaldyq kómek alatyn álemniń eń kedeı elinen ekonomıkalyq turǵyda myqty derjavaǵa aınalyp, eldi demokratııalandyrý men ındýstrııalandyrýda jetistikke jetkenin atap ótti.

Búgingi semınar arqyly Qazaqstanmen ózderiniń damý tájirıbesin bólisý mańyzdy ekenin qosa aıtty.