Koreıa Qazaqstanda kóz jumǵan general batyrynyń súıegin eline alyp ketti
Arnaıy sharada oblys ákimi Gúlshara Ábdiqalyqova, oblys ákimniń orynbasary Serik Ahmet, qala ákiminiń mindetin atqarýshy Bektas Nurıdınov, oblystyq koreı etno-mádenı birlestiginiń tóraǵasy Elena Kım mártebeli meımandarǵa qurmetin bildirdi.
Koreıa Respýblıkasynyń patrıottar jáne ardagerler jónindegi mınıstri Hvan Gı Chhol, Koreıa Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Ký Hong Sok, «General Hon Bom Do memorıaly» qorynyń Tóraǵasy Ý Von Shık, akter Cho Von Djýn Syr jurtynyń qaharman tulǵaǵa degen erekshe qurmeti úshin rızashylyǵyn bildirdi. Bul sapar yntymaqtastyq baǵytyndaǵy ekijaqty áriptestikti, dostyqty odan ári nyǵaıtýǵa múmkindik beretinin aıtyp, alǵysyn jetkizdi.
Sharada Qazaqstan Respýblıkasynyń sarbazdary Hon Bom Donyń súıegin tabystaý rásimin ótkizip, generaldyń tabytyn Koreıa Respýblıkasynyń sarbazdaryna tabys etti. Іs-sharaǵa qatysýshylar Hon Bon Donyń qurmetine qoshtasý rásimin jasap, bas ıdi.
Mártebeli meımandar Qazaqstan delegatsııasymen qoshtasyp, arnaıy qurmetin jetkizdi.
Aıta keteıik, sheteldik delegatsııa saparynyń basty maqsaty - ótken ǵasyrdyń basynda japon basqynshylaryna qarsy koreı partızandyq qozǵalysynyń batyry bolǵan, general Hon Bom Donyń súıegin týǵan jerine alyp ketý jáne eki el arasyndaǵy yntymaqtastyqty damytý baǵytynda birlesken jobalardy talqylaý.
Resmı sapardyń alǵashqy kúninde mártebeli meımandar «Hon Bom Do» memorıaldyq keshenine baryp, general Hon Bom Donyń rýhyna taǵzym etti. Sondaı-aq, jergilikti koreı halqynyń rásimi boıynsha eske alý sharasynan keıin Hon Bom Donyń qabirindegi súıegin Qazaqstandyq qurmet qaraýylynyń qatysýymen resmı shyǵaryp salý rásimin ótkizdi.
Munan keıin oblystyq mekemeler úıinde oblys basshylyǵy Koreıa Respýblıkasy delegatsııasy ókilderimen kezdesti. Qos tarap ózara baılanysty damytýǵa baǵyttalǵan mańyzdy máseleler qaraldy. Bilim, aýyl sharýashylyǵy, densaýlyq saqtaý salalaryndaǵy ózara is-qımyldy keńeıtý, týrızm salasyn damytý jáne ınvestıtsııalyq jobalardy júzege asyrý baǵytynda birlesken jobalar talqylandy.