Koreıa-Qazaqstan mádenı almasý jyly aıasynda qandaı sharalar ótedi

ASTANA. QazAqparat - 2022-2023 jyldar Koreıa men Qazaqstannyń ózara mádenı almasý jyly dep jarııalandy. Osyǵan oraı, Koreıanyń Mádenıet, sport jáne týrızm mınıstrligi men Koreıa halyqaralyq mádenı almasý agenttigi birigip, túrli salada mádenı-aǵartý is-sharalaryn ótkizedi, dep habarlaıdy QazAqparat. Eki el dostyǵyn nasıhattaıtyn qandaı mádenı sharalar ótetinine sholý jasaýdy jón kórdik.

​​❙ Derekti fılm

Koreıanyń óner akademııasy Qazaqstandaǵy Temirbek Júrgenov atyndaǵy Ulttyq óner akademııasymen birlese otyryp, «Koreıa jáne Qazaqstan: dıaspora ýaqyty men keńistikter qıylysy» atty taqyrypta tórt derekti fılm túsirip jatyr.

❙ Dástúrli kórsetilim

23 qyrkúıekte Qazaqstandaǵy Almaty teatrynda Ulttyq halyq aspaptar orkestri men pansorı sheberi, sondaı-aq qazaqtyń dástúrli aspaby - dombyrada oınaıtyn mýzykant birlesip kontsert ótkizedi. Kontsertte túrli mýzykalyq shyǵarmalar – dástúrli halyq ánderinen bastap, qazaq kompozıtory Erkesh Shákeevtiń klassıkalyq shyǵarmalaryna deıin eki el arasyndaǵy dostyqty dáripteıtin ulttyq aspaptarmen qaıta óńdelgen zamanaýı mýzyka oryndalady.

❙ Anımatsııalyq fılm

Koreıanyń «Býchon» halyqaralyq anımatsııa festıvali jáne Qazaqstannyń «Baıqońyr» halyqaralyq qysqametrajdy fılmder festıvali birlesip, anımatsııalyq fılmderdiń arnaıy kórsetilimin uıymdastyrady. 8 qyrkúıekte Qazaqstanda «Koreı anımatsııasynyń arnaıy kórsetilimi» ótedi. Onda Koreıanyń 12 anımatsııalyq fılmi kórermen nazaryna usynylady, onyń ishinde Lı Song Gangtyń «Aıa hanshaıymy» jáne rejısser Lım Che Rınniń «Men jaıly» fılmderi bar. Atalǵan rejısserler arnaıy dáris ótkizip, kórermendermen kezdesedi, onyń ishinde «Aıa hanshaıymynda» Aıa rólin somdaǵan ánshi Bek Aenmen dıalog josparlanǵan. «Qazaqstandyq anımatsııanyń arnaıy kórmesi» aıasynda 21 qazanda Koreıada kezekti «Koreı anımatsııasynyń arnaıy shoýy» ótedi.

❙ Jastar teatry

Koreı halyqaralyq mádenı almasý qory Respýblıkalyq memlekettik akademııalyq koreı teatrymen birlese otyryp, qalyń kórermenge teatr týyndysyn sahnalamaq. Qoıylym 11 jáne 12 qarashada Qazaqstannyń ulttyq jáne memlekettik teatrlarynda kórsetiledi dep kútilýde. Eki el jastarynyń bul birlesken qoıylymy Qazaqstan Ulttyq bankiniń eskertkish monetasynda beınelengen koreı mıfologııasynyń keıipkeri -Dangýnnyń oqıǵasyna negizdelgen. Bul týyndy akademııalyq koreı teatrynda kórsetiletin bolady.

❙ Arnaıy fotokórme

14 qarasha men 8 jeltoqsan aralyǵynda Qazaqstan Respýblıkasynyń Á.Qasteev atyndaǵy memlekettik óner murajaıynda ataqty fotograf Kım Ok Sonnyń jeke kórmesi ótedi. Kórmede fotograf ártúrli sebeptermen kóship kelgen adamdardyń ómiri men mańyzdy tarıhı oqıǵalardy qamtıtyn 50-den astam jumystaryn usynady.