Koreıa Aqtóbe medıtsınasyna 40 mln dollar grant bóledi

AQTÓBE. QazAqparat - Aqtóbe oblysynyń ákimi Berdibek Saparbaev Ońtústik Koreıanyń densaýlyq saqtaý jáne áleýmettik damý mınıstrliginiń, «Koreıa Telekom» korporatsııasynyń, Pýsan ulttyq ýnıversıtetiniń gospıtali men Pýsan tehnoparkiniń ókilderimen kezdesti, dep habarlaıdy QazAqparat tilshisi.

Elbasy Nursultan Nazarbaevtyń Aqtóbede medıtsınalyq klasterdi damytý týraly tapsyrmasyna oraı, óńirde Ońtústik Koreıamen tyǵyz baılanys ornady. Ári Memleket basshysy Ońtústik Koreıaǵa sapary kezinde tsıfrlyq densaýlyq saqtaý júıesine aqparattyq-baılanys tehnologııalaryn transfertteý kelisimin jasaǵan bolatyn. Qazir osy baǵyttaǵy jumys jalǵasyp jatyr. Aqtóbe oblysy ákiminiń baspasóz qyzmeti aldaǵy 5 jylda Koreıa 40 mıllıon AQSh dolllary kóleminde grant bólinetinin jetkizdi.

 

«Memleket basshysy bizge damyǵan 30 eldiń qataryna kirý mindetin qoıyp otyr. Biz bul mindetke tek bilimdi, salaýatty azamattarmen ǵana qol jetkize alamyz. Osyǵan baılanysty medıtsınalyq klasterdi damytyp, Kangnam Severanspen tyǵyz baılanystamyz. Birlesken jumystardyń nátıjesinde óńirde búırek almastyrýdyń - 29, baýyr almastyrýdyń 9 operatsııasy jasaldy. Oblysta sandyq tehnologııalardy engizýdiń eń tıimdi sharalary da qabyldanýda»,- dedi oblys ákimi Berdibek Saparbaev.

Ońtústik Koreıa Aqtóbe qalalyq emhanalaryna tsıfrlyq tehnologııalardy engizip, skrınıngti qashyqtan ótkizýge qajetti tórt medıtsınalyq qural-jabdyq jıyntyǵyn jetkizdi. Sonymen qatar, ár toqsan saıyn ýltradybystyq apparattarmen jumys isteý, ınnovatsııalyq skrınıng ádisterin úıretý boıynsha sheberlik sabaqtary uıymdastyrylady. Kezdesý kezinde Ońtústik Koreıa densaýlyq saqtaý mınıstrligi bóliminiń dırektory Hıýn Gı Pak negizgi maqsat tsıfrlyq medıtsına ortalyǵyn ashý ekenin jetkizdi.

  

Taraptar yntymaqtastyq týraly memorandýmǵa qol qoıdy.