Qordaılyqtar jazǵy lagerde memlekettik tildi úırenip jatyr

TARAZ. QazAqparat – Jambyl oblysynyń ákimi Berdibek Saparbaev Qordaı aýdanyna sapary barysynda Sortóbe aýylyndaǵy Mádenıet úıinde jumys istep otyrǵan «Tilder saıabaǵy» jazǵy lagerinde boldy. Munda jergilikti turǵyndarǵa memlekettik jáne shet tilderi oqytylýda, dep habarlaıdy QazAqparat.

Áleýmettik jobanyń jetekshisi Baqnur Zııabekovtiń aıtýynsha, búginde lagerde 200 adam qazaq, aǵylshyn, frantsýz tilderin úırenýde. Tyńdaýshylar arasynda balalar da, eresekter de bar. Ashyq aspan astyndaǵy sharalar aptasyna úsh ret ótkiziledi. Aýyl turǵyndaryna Nazarbaev Ýnıversıtetiniń, ál-Farabı atyndaǵy Qazaq ulttyq ýnıversıtetiniń jáne Qazaq ulttyq qyzdar pedagogıkalyq ýnıversıtetiniń stýdentteri sabaq beredi.

Aımaq basshysy aýdandaǵy belsendiler men eriktilerge qyrýar sharýalary úshin alǵysyn bildirip, turǵyndarǵa memlekettik tildi bilýdiń mańyzdylyǵyn eske saldy.

«Eger ata-analar balalarymen qazaqsha sóılesse, balalar tez til úırenedi. Memlekettik tilmen qatar, básekege qabiletti bolýǵa kómektesetin basqa da shet tilderin bilý qajet. Bizdiń mindetimiz – jastarǵa laıyqty bilim berip, birneshe tildi meńgerýine jaǵdaı jasaý. Osyndaı jumysty basqa aýyldarda da uıymdastyrý kerek», - dedi Berdibek Saparbaev.

Sondaı-aq óńir basshysy aýyldaǵy balyq sharýashylyǵyn damytýǵa jaqsy jaǵdaı jasalǵanyn nazardan tys qaldyrmady. Ol forel men bekire tuqymdaryn ósiretin fermada bolyp, qurylymnyń tynys-tirshiligimen tanysty. Munda jylyna 5-7 tonna balyq óndiriledi eken. Ónimder jergilikti aımaqta satylady. Balyqtar shetelden ákelinetin arnaıy taǵammen qorektenedi.

Jumys sapary barysynda oblys ákimi aýdandaǵy joldardyń qurylysymen de tanysty. Ol merdiger kompanııa ókilderimen birge tóselgen asfalttyń sapasyn tekserdi.

Bıyl Qordaı aýdanynda ınfraqurylymdy jaqsartýǵa, onyń ishinde joldardy jóndeýge shamamen 7 mıllıard teńge bólindi. Bul qarjyǵa jalpy uzyndyǵy 352 shaqyrym avtomobıl joly jóndeýden ótpek.