Qordaılyqtar eki muqtaj otbasyna asarlatyp úı alyp berdi

QORDAI. QazAqparat – Jambyl oblysy Qordaı aýdanynda qazaqtyń erteden kele jatqan ıgi dástúri qaıta jandandy. Aýdan turǵyndary qarajat jınap, kómekke muqtaj eki birdeı otbasyna baspana alyp berdi. Birinshi úı Kúnbatys-2 aýylynda bolsa, ekinshisi Býlar batyr aýylynda, dep habarlaıdy QazAqparat tilshisi.

Igi is «Asarlatyp úı salý» jobasy aıasynda júzege asqan.

Qazaqstan Táýelsizdiginiń 30 jyldyǵy men 1 naýryz - Alǵys aıtý kúnine oraılastyrylǵan qaıyrymdylyq sharasy aldymen Kúnbatys-2 aýylynda bastaldy.

Munda kópbalaly ana Aıman Arynovaǵa 4 bólmeli úıdiń kilti tapsyryldy.

Qonystoı ıesin quttyqtaý úshin oblystyq ishki saıasat basqarmasy basshysynyń orynbasary Serjan Qýanyshov, jergilikti atqarýshy organ ókilderi, aýdandyq ardagerler keńesiniń músheleri, máslıhat depýtattary jáne baspanaly bolǵan otbasynyń et baýyr jaqyndary jınaldy.

Qýanysh ıesin ardagerler keńesiniń tóraǵasy Birjan Álimbet jáne oblystyq máslıhat depýtaty Lýgmar Býlarov quttyqtasa, Serjan Qýanyshov saltanatty túrde úı kiltin usyndy.

«Bizge qamqorlyq kórsetken jandarǵa aıtar alǵysym sheksiz. Endi úıimiz bar, kelesi maqsatymyz - balalarymyzǵa tárbıe berip oqytý, elin súıer azamat qylý. Asar jobasyna uıytqy bolǵan oblys ákimi Berdibek Saparbaevqa, aýdan basshylyǵyna jáne barsha qoldaý kórsetken aýyldyqtarǵa raqmetimdi aıtamyn», - deıdi alty balanyń anasy Aıman Arynova.

1600000 teńgege alynǵan úı 4 bólmeli. Úı aımaǵynda 35 sottyq jeri bar.

Demeýshilerdiń aıtýynsha, aldaǵy ýaqytta úıge qosymsha bólme salyp berý josparlanyp otyr.

Osydan keıin quttyqtaý legi Bular batyr aýylynda jalǵasty. Munda jalǵyzbasty ana Sofııan Isharovaǵa úı berildi.

Baspana ıesin Lýgmar Býlarov jáne aýdannyń qurmetti azamaty Tóle Súgirbaı quttyqtap, izgi tilegin jetkizdi.

Olar Sofııan Isharovaǵa saltanatty túrde úıdiń kiltin usynsa, ulttyq kıim kıgen ájeler qazaqy shashý shashty.

6 bólmeli úıdiń 15 sotyq jeri bar, barlyq jaǵdaıy jasalǵan. Baspanaly baqytyna ıe bolǵan ana qýanysh áserimen bólisip, kópshilikke alǵysyn aıtty.

«Meniń kúıeýim jol apatynan qaıtys bolyp, eki balammen jalǵyz qaldym. Qıyn jaǵdaıǵa tap bolǵanymdy estigen aýyl turǵyndary aqsha jınap, osyndaı keremet úıdi alyp berdi. Osy isti atqarǵan, qol ushyn kómegin aıamaǵan barsha azamattarǵa alǵysym sheksiz», — deıdi úı ıesi.

Aıta ketý kerek, atalǵan aýyldarda «Asar» jobasyn «Vynhýa» dúngen mádenı ortalyqtarynyń qaýymdastyǵy qoldap, oǵan jergilikti kásipkerler, sharýa qojalyqtary jáne de qarapaıym aýyl turǵyndary aqsha aýdaryp, ıgi is atqarýǵa nıet bildirdi.

Qoǵamdyq qaýymdastyqtyń jetekshisi Aısha Idybonyń aıtýynsha, asar dástúri munymen toqtalmaı, jalǵasyn tabady.

Jaqyn arada muqtaj jandarǵa taǵy da baspana syılaý josparda bar eken.