Qordaılyqtar Alǵys aıtý kúnin joǵary deńgeıde toılady
Alǵys aıtý kúni merekesi Qordaı aýylynda keń kólemde atalyp ótti. Kún nurymen shýaǵyn shashqan kóktemniń alǵashqy kúnin aýyl turǵyndary kóterińki kóńil-kúımen qarsy aldy. Tań sáriden ortalyq alańǵa qalyń kópshilik jınalyp, aıtýly merekeni toılaı bastady. Aıta ketetini, bul mereke Qazaqstan halqy Assambleıasynyń 25 jyldyǵymen tuspa tus keldi.
Eń áýeli Noǵaıbaı bı eskertkishine gúl shoǵyn qoıý rásimi ótip, jınalǵandar baba rýhyna taǵzym etti. Sodan soń halyq sahna aldyna qaraı bet aldy. Ortalyq alańda kıiz úıler tigilip, altybaqan ornatylyp, bozkilem tóselip, keń dastarhan jaıyldy. Jas sportshylar alańdaǵy toǵyzqumalaq oıynyn oınap, bozkilemde ónerin kórsetse, endi bireýleri qol kúrestirip, ózara myqtyny anyqtady. Al, sahna tórine túrli ult ókilderinen quralǵan aýdan ónerpazdary kontserttik baǵdarlama usynyp, bar ónerin pash etti. Aýdan ákimi Rústem Dáýlet jáne aýdan aqsaqaldary jınalǵan kópshilikti Alǵys aıtý kúnimen quttyqtap, izgi tilekterin aıamady. Keıinnen túrli ult ókilderi sahnaǵa kóterilip, halyqty birlikke shaqyryp, qazaq halqyna alǵysyn aıtty.
Aýdannyń ulttyq mádenı birlestik ókilderi sahna mańyna ornatylǵan shańyraq astynda «Dostyq» bıin bılep, keıin barsha turǵyndarǵa ulttyq astan dám tatýǵa shaqyrdy. Jınalǵan kópshilik keremet uıymdastyrylǵan is-sharaǵa rızashylyǵyn bildirdi.
Sondaı-aq, aımaq basshysy Berdibek Saparbaev Qordaı aýdanyndaǵy Qarakemer, Masanshy jáne Sortóbe aýyldarynda bolyp, turǵyndardy merekemen quttyqtap, qoǵamdaǵy birlikti, beıbitshilik pen kelisimdi saqtaýǵa shaqyrdy.
- Sonaý qıyn-qystaý kezeńderde kóptegen etnostar men ulttar qazaq jerine qonys aýdardy. Qazaqtar eshkimniń de dini men tiline qaramaı, qushaq jaıa qarsy alyp, qolyndaǵy nanymen bólisti. Sodan beri jergilikti halyq pen qonys aýdarýshylar etene aralasyp, tatý-tátti tirlik keshýde. Qazaqstan – dostyqtyń ortalyǵy, - degen oblys ákimi aýdandaǵy ahýaldyń turaqtalǵanyn basa aıtyp ótti.
Sondaı-aq, kezdesýde Masanshy aýylynyń turǵyny Lýı Ishar eldegi barlyq etnostardyń tatý-tátti tirshiligin tilge tıek etip, olardy memlekettik tildi meńgerýge shaqyrdy.
- Biz Qazaqstanda turyp jatqan soń memlekettik til – qazaq tilin bilýge mindettimiz. Qazaqstan bizge óz mádenıetimiz ben dástúrimizdi saqtaýǵa jaǵdaı jasady. Biz de endi óz kezegimizde qazaq tilin bilý arqyly olarǵa degen qurmetimizdi kórsetýge tıispiz. Memlekettik tildi bilsek ózara qarym-qatynasymyz da tereńdeı túseri sózsiz,-deıdi L.Ishar.