Qordaılyq kásipkerler az qamtylǵan 5 otbasyna asarlatyp úı salyp berdi

TARAZ. QazAqparat – «Asarlatyp úı salýy» jobasy aıasynda Jambyl oblysynyń Qordaı aýdanynda 5 páterlik kottedj tıpti úı salyndy. Jańa úıdiń kilti qonystanýshylarǵa Jańa jyl qarsańynda tabystaldy, dep habarlaıdy QazAqparat tilshisi.

Saltanatty shara barysynda Qazaqstan Respýblıkasynyń Indýstrııa jáne ınfraqurylymdyq damý mınıstri Beıbit Atamqulov pen Jambyl oblysynyń ákimi Berdibek Saparbaev jańa qonystoı ıelerine turmystyq tehnıkalar syılady.

«Qordaı aýdany turǵyndarynyń merekelik kóńil-kúıine qaraı kún de bizdi shýaǵyn shashyp ári jyly raımen qarsy alyp otyr. Osyndaı qýanyshty kúnder kóbeıe bersin! Muqtaj otbasylarǵa kómek kórsetýge atsalysqan kásipkerlerge rızashylyǵymdy bildiremin», - dedi oblys ákimi.

Kópbalaly ana Olesıa Dvortsova mundaı úlken úıge ıe bolam dep oılamaǵan.

«Men taǵy birneshe jyl baspana kezeginde turamyn dep oıladym. Tipti senbedim. Mine, oılamaǵan jerden jyl sońynda meniń ómirimde úlken jańalyq bolyp otyr. Osy ıgi iske úles qosqan barlyq janashyr adamdarǵa alǵysymdy qalaı aıtarymdy da bilmeımin», - deıdi ol.

«Altyn alqa» ıegeri Raýshan Qojamqulova da qýanyshtan kóz jasyna erik berdi.

Ol bıylǵy jaz aıynda ǵana oblys ákimine júginip, baspana máselesin sheship berýdi suraǵan.

«Oblystyq ákimshilik meniń ótinishimdi tyńdady jáne eskerýsiz qaldyrmady. Bul kún meniń otbasym úshin eń mańyzdy sát bolyp, este qalady», - deıdi ol.

Osylaısha, qonys ıeleri jańa úıge jaıǵasyp, jergilikti kásipkerler olarǵa jıhaz syılady.