Qordaıdaǵy jaǵdaı turaqty - Berdibek Saparbaev

NUR-SULTAN. QazAqparat – Jambyl obylysynyń ákimi Berdibek Saparbaev Qordaıdaǵy oqıǵadan keıin dúngenderdiń kóship jatqany týraly aqparatty joqqa shyǵardy, dep habarlaıdy QazAqparat tilshisi.

«Qazir Qordaıdaǵy jaǵdaı turaqty. Barlyq zalal orny toltyryldy. Tek bıyl bir ǵana Qordaı aýdanyna 35 mlrd teńge aqsha bólindi. Sonyń nátıjesinde jańadan 4300 jumys oryny ashyldy. Qordaı aýdanynyń kóptegen máseleleri, jol, aýyzsý problemasy sheshildi. Qordaı aýdanynda halyqty gazben qamtamasyz etý deńgeıi 95 paıyzǵa jetti. Jyldyń basynda 47 paıyz bolǵan. Kásipkerlik baǵytynda da ósim bar. Keıbir baspasóz quralynda «dúngender basqa jaqqa kóship ketti, kásibin jalǵastyrýǵa kedergi jasap jatyr» degen aqparat tarap jatyr. Bárin zerttedik. Olar burynǵydaı Qordaı, Shý aýdanynda, kórshiles Almaty jáne Qaraǵandy oblystarynda jumys istep jatyr. Birde-bir dúngen Reseıge nemese basqa memleketke kóship ketken joq», - dedi Jambyl obylysynyń ákimi Ortalyq kommýnıkatsııalar qyzmetinde ótken baspasóz máslıhatynda.

Ákimniń aıtýynsha Qazaqstan úshin qazir eń keregi – barlyq ult ókilderiniń birligi.

«Ekinshiden, qazaq halqy asharshylyq bolsyn, soǵys nemese repressııa bolsyn bir úzim nanyn qasyndaǵylarǵa bólip bergen. Ol týraly Elbasynyń aıtqanyn, bergen tapsyrmasyn bilesizder. «Qazaq halqyna myń alǵys» monýmentin ashtyq. Ol jerde tek bıýdjettiń ǵana aqshasy jumsalǵan joq, kásipkerler de, demeýshiler de kómek kórsetti», - dedi ol.