Qordaıdaǵy ǵylymı ınstıtýtta koronavırýsqa qarsy vaktsına ázirlenip jatyr

QORDAI. QazAqparat – Qordaıdaǵy bıologııalyq qaýipsizdik máselelerin ǵylymı-zertteý ınstıtýtynda koronavırýsqa qarsy vaktsına ázirlenýde, dep habarlaıdy QazAqparat Jambyl oblysy ákiminiń baspasóz qyzmetine silteme jasap.

Jambyl oblysynyń ákimi Berdibek Saparbaev Qordaıdaǵy jumys sapary barysynda aýdan aýmaǵyndaǵy bıologııalyq qaýipsizdik máselelerin ǵylymı-zertteý ınstıtýtyna da arnaıy at basyn burdy. Koronavırýs pandemııasymen kúrestiń qazirgi jaǵdaıynda strategııalyq rejimdik obektiniń jumysy erekshe mańyzǵa ıe.

Ǵalymdar densaýlyq saqtaý jáne veterınarııa salasyndaǵy túrli ınfektsııalarmen kúreske zor úles qosyp keledi, jyl saıyn qaýipti jáne asa qaýipti ınfektsııalarǵa qarsy 27 mıllıonnan astam ekpeni jetkizedi. Olar Dúnıejúzilik densaýlyq saqtaý uıymymen, AQSh aýrýlardyń aldyn alý jáne baqylaý ortalyǵymen, Halyqaralyq Vena ýnıversıtetimen jáne basqa da bedeldi uıymdarmen tyǵyz baılanysta jumys isteıdi.

Zertteý ınstıtýty sheteldik analogtarmen salystyrǵanda úsh ese arzan bolatyn nodýlıarlyq dermatıtke qarsy vaktsınany ázirledi. Ony engizý nátıjesinde respýblıkalyq bıýdjettiń únemdelýi eki mıllıard teńgeni qurady. Instıtýt óz ónimderin ónerkásiptik aýqymda óndirse, kóp paıda ákeletin edi, sondyqtan jylyna vaktsınalardyń 60 mıllıon dozasyna deıin qýattylyǵymen ımmýnobıologııalyq preparattar shyǵaratyn bıofarmatsevtıkalyq zaýyt salý qajettiligi týyndaýda.

Atalǵan joba quny - 3,5 mıllıard teńge. Jańa óndiristi iske qosý úshin qajetti joǵary bilikti kadrlar, mıkroorganızmderdiń qaýipti jáne asa qaýipti shtammdarynyń biregeı kollektsııasy, ǵylymı ınfraqurylym, zııatkerlik menshik sekildi jaǵdaılar jetkilikti. Sonymen qatar, ǵalymdar búginde koronavırýsqa qarsy vaktsına daıyndaýmen aınalysýda.

«Qazaqstan Prezıdentiniń osyndaı ǵylymı ortalyqtardy qoldaý týraly tapsyrmasy bar. Sońǵy oqıǵalar halyqtyń qaýipsizdigi men densaýlyǵy máselesin ǵana emes, olardyń qanshalyqty mańyzdy ekenin de kórsetti. Sizderdiń jumystaryńyz el ekonomıkasynyń damýyna úlken úles qosady, kez kelgen ýaqytta týyndaýy múmkin ártúrli pandemııa zardaptaryn azaıtady. Álem jahandanýda jáne qysqarýda, adamdar aýrýdyń eshkimdi aıamaıtynyn túsindi. Bul jaǵdaıda Qazaqstan jahandyq syn-qaterlerge jedel jaýap bere alatyn ózindik ǵylymı ortalyqtardyń júıesin qurýǵa tıis. Oblystyq bılik zaýyttyń qurylysyna mindetti túrde qoldaý kórsetedi. Másele muqııat, jan-jaqty pysyqtaýdy talap etedi, biraq ol mindetti túrde oń sheshimin tabady», - dep atap ótti oblys ákimi B.Saparbaev.