Qordaıda jazylyp shyqqan 6 adam koronavırýsty janaza kezinde juqtyrǵan

TARAZ. QazAqparat – 22 sáýir kúni Jambyl oblysynda koronavırýs ınfektsııasynan taǵy jeti adam emdelip shyqty, dep habarlaıdy QazAqparat oblys ákimdiginiń resmı saıtyna silteme jasap.

Aýrýdan aıyqqan jeteýdiń biri – 1992 jyly týǵan Nur-Sultan qalasynyń turǵyny. Ol 19 naýryz kúni Taraz qalasyna kelip, 5 sáýirde keýde tusynyń aýyrýyna, murynnyń bitelýine jáne kózdiń qyzarýyna qatysty shaǵymmen karantındik statsıonarǵa jatqyzylǵan. Odan COVID-19-ǵa alynǵan taldaýlar syrqat ekenin kórsetken.

Qalǵan alty em alýshynyń barlyǵy 19 ben 62 jas aralyǵyndaǵy turǵyndar. Úsheýi - er, úsheýi áıel adam. Olar koronavırýstyq ınfektsııany Qordaı aýdanynda jerleý rásimi kezinde juqtyrǵan. Barlyǵy osy aýdannyń turǵyndary bolyp tabylady. Bir naýqas áıelden juqtyryp, 6 sáýirde aýrýhanaǵa jatqyzylǵan.

Dertten aıyqqan jeti turǵyn da eki apta boıy ınfektsııalyq statsıonarda bolyp, emdeý sharalaryn oıdaǵydaı ótkizgen.

Algorıtmge sáıkes, olardan KVI-ǵa alynǵan eki rettik zerthanalyq taldaýlar teris nátıje kórsetken. Aldaǵy eki apta boıy endi olar úı karantıninde dárigerlerdiń baqylaýynda bolady.

Jalpy aımaqta koronavırýstan 31 adam emdelip shyqty.