Qordaıda shekaramańy yntymaqtastyǵy halyqaralyq ortalyǵyn qurý josparlanýda

TARAZ. QazAqparat – Qazaqstan Respýblıkasynyń Saýda jáne ıntegratsııa mınıstri Baqyt Sultanov pen Qyrǵyzstannyń ekonomıka jáne qarjy vıtse-mınıstri Sultan Ahmatov Qordaı aýdanyna kelip, Jambyl oblysynyń ákimi Berdibek Saparbaevpen birge «Qarasý» jáne «Qordaı» baqylaý-ótkizý pýnkteriniń qyzmetimen tanysty, dep habarlaıdy QazAqparat tilshisi.

Jumys saparynyń basty maqsaty – «Qorǵas» shekaramańy yntymaqtastyǵy halyqaralyq ortalyǵy sekildi «Qarasý» baqylaý-ótkizý pýnktiniń janynda «Qordaı» shekaramańy yntymaqtastyǵy halyqaralyq ortalyǵynyń jobasyn júzege asyrýǵa daıyndyqqa negizdeldi. «Qarasý» BÓP arqyly negizinen júk kólikteri ótedi. Osyǵan oraı qazaqstandyq bılik munda arnaıy vızalyq rejımmen shektesetin memleketterdiń ónerkásiptik kooperatsııasy sekildi dúnıe qurýǵa nıeti bar. Qosymsha quny joǵary taýarlardy ótkizý.

Erkin ekonomıkalyq aımaqtyń qatysýshylaryna birqatar jeńildikter men preferentsııalar beriledi. Atap aıtqanda, belgili bir merzimge jer ýchaskelerin tegin berý, daıyn ınfraqurylymdy paıdalaný múmkindigi, korporatıvtik tabys salyǵynan, múlik salyǵy men QQS, jer salyǵynan bosatý jáne taǵy basqa jeńildikter qarastyrylǵan.

Qazaqstandyq taraptyń múmkindikterin tanystyra otyryp, Baqyt Sultanov qyrǵyz áriptesine shekaraǵa jaqyn mańda 15 gektar memlekettik jer telimi daıyn ekenin, qajet bolǵan jaǵdaıda ony 100 gektarǵa deıin ulǵaıtýǵa bolatyndyǵyn aıtty. Bul rasynda mańyzdy artyqshylyq desek bolady, sebebi jeke menshik ıelerinen ýchaskelerdi satyp alýǵa ýaqyt pen kúsh jumsalmaıdy. Al, baqylaý-ótkizý pýnktiniń ǵımaraty shekaraǵa jaqyn jerge aýystyrylyp, irgeles aýmaqqa aýyr júk kólikterine arnalǵan turaq salynady. Arǵy bettegi Qyrǵyzstannyń Shý oblysynyń shekara aımaǵyndaǵy ýchaskeler jeke menshikte ekenin aıta ketý kerek.

Osy jáne basqa da faktorlardy eskere otyryp, oblys ákimi Berdibek Saparbaev yntymaqtastyq ortalyǵyn tolyǵymen Qazaqstan aýmaǵyna ornalastyrýdy usyndy. Sultan Ahmatov bul másele qyrǵyz bıligi tarapynan jan-jaqty talqylanyp, eki-úsh kúnnen keshiktirilmeı jaýap beriletinin jetkizdi. Óz kezeginde Baqyt Sultanov jobanyń qazaqstandyq tujyrymdamasy daıyn ekenin, ony ýaqyt sozbaı kórshi elge joldaı alatyndaryn atap ótti.

Budan soń qonaqtar qaıta jańǵyrtylǵan «Qordaı» baqylaý-ótkizý pýnktine at basyn burdy, ol negizinen jeke adamdar men jeńil kólikterdiń ótýine arnalǵan. Munda aıtarlyq oń ózgerister oryn alǵan. Aıtalyq, qozǵalys jolaqtary ekiden segizge deıin ulǵaıyp, tekserý kabınalarynyń sany 12-den 34-ke deıin artqan. Al qurylystyń jalpy aýdany 4,9 myń sharshy metrge jetken. Eger buryn jaıaý júrginshilerdi ótkizý qaýqarlyǵy táýligine alty myń adamnan aspasa, qazir – 25 myńǵa deıin, al shekaradan ótetin avtokólikter sany táýligine 2,5 myńǵa deıin ósken. Іri kólemdi kólikterge, sonyń ishinde negizinen jolaýshylar avtobýstaryna arnalǵan tekserý kesheni jumys jasaıdy. Ol úshin bir kólikke bes mınýttan aspaıtyn ýaqyt jumsalady. Al, zamanaýı qondyrǵylar saǵatyna 700 dana qol júgin skanerleýge qabiletti.