Qordaıda qazaq pen dúngenniń tatýlyǵy jaıly «Taǵylym» fılminiń tusaýy kesildi

QORDAI. QazAqparat – Qordaı aýdandyq Mádenıet úıinde kópten kútken «Taǵylym» fılminiń tusaýkeseri ótti. Ulttar dostyǵyn sýrettelgen týyndyǵa aýdan aqsaqaldary men aýdan ákimdiginiń bólim basshylary qatysyp, oń baǵasyn berdi, dep habarlaıdy QazAqparat tilshisi.

Fılm eki dostyń qarym-qatynasy jaıynda túsirilgen. Naqtyraq aıtsaq, qazaq pen dúngen ulty ókilderiniń dostyǵy týraly. Onyń barysynda osydan 140 jyl buryn dúngen ultynyń qazaq jerine kelip qonystanǵan ýaqyty sýretteledi.

Onda qazaq eliniń qonaqjaılyǵy ádemi kórinis taýyp, pana izdep kelgen qonaǵyna qonysynan jer berip, baýyryna basqany kórinis tapqan. Sol ýaqytta kishkentaı Maǵjan Şımarmen aıyrylmas dos bolyp, olardyń jaqyndyǵy búgingi urpaǵyna deıin jalǵasqanyn osy bir týyndy áserli jetkizgendeı.

Bir jarym ǵasyrǵa jýyq ýaqyt birge kún keship, talaı soqpaqtan birge ótip, qyzyq-qıynshylyqty qatar kórip keledi. Sol 140 jyldyq dostyqty bir týyndyǵa syıǵyzǵan «Taǵylym» kınosy talaıdyń kóńilinen shyǵatynyna senim mol.

Fılmdi birge tamashalaǵan qazaq jáne dúngen aqsaqaldary sońyra sóz alyp, kınodan alǵan áserimen bólisti.

Tarıhty qozǵaǵan qarııalar eki ulttyń arasyndaǵy dostyqtyń jarqyn sátteri týraly áńgimelep, sol úılesimdilik aldaǵy ýaqytta jalǵasa beretinine senim bildirdi. Qushaq ashyp, qol ustasqan dostyq sońy estelik sýretke túsip, máz meıram bolyp tarqasty.

Aıta ketý kerek, aýdan prokýratýrasynyń ultaralyq kelisim jospar-jobasyn júzege asyrý barysynda aýdan ákimdiginiń qoldaýymen jaryqqa shyqqan dúnıe jýyrda barsha kórermenge jol tartpaq.