Qordaıda halyqqa jumys taýyp beretin ortalyq ashyldy

QORDAI. QazAqparat – Jambyl oblysy Qordaı aýdanynda jumyspen qamtýdy kózdeıtin eki «Atameken» qoldaý ortalyǵy ashyldy. Jobany Ulttyq kásipkerler palatasy jáne QR Eńbek jáne halyqty áleýmettik qorǵaý mınıstrligi qoldaǵan, dep habarlaıdy QazAqparat óńirlik kásipkerler palatasynyń baspasóz qyzmetine silteme jasap.

«Atameken» qoldaý ortalyǵynyń dál osy aýdannan ashylýy tegin emes. Bul týraly «Atameken» QR UKP basqarma tóraǵasynyń orynbasary Eldar Jumaǵazıev ortalyqtyń ashylý rásiminde sóılegen sózinde aıryqsha aıtyp ótti.

«Qordaı aýdanynda bolǵan sońǵy oqıǵalardan keıin osy ortalyq halyq arasyndaǵy áleýmettik shıelenisti jeńildetip, jumyssyzdyq pen kásipkerlik qyzmetke jumyldyrý máselelerin aıtarlyqtaı sheshýge kómektesýi kerek. «Atameken» qoldaý ortalyǵynyń biregeıligi – lokatsııasynda. Qordaı aýdanynda jumyspen qamtýdyń mobıldi ortalyqtary – Mádenıet úıi jáne Qarakemer aýylynda ornalasqan. «Atameken» qoldaý ortalyǵynyń mindeti – halyqqa jaqyn bolý, jumyssyz adamdarmen baılanys ornatý ári olardy jumyspen qamtý»,-dedi Eldar Jumaǵazıev.

Al Jambyl oblysy óńirlik kásipkerler palatasynyń dırektory Oljas Qarjaýovtyń aıtýynsha, ortalyqta búgingi tańda Qordaı aýdanynda júrgizilgen saýalnama negizinde bos jumys oryndarynyń bazasy qalyptasqan. Jumyssyzdardyń ótinishi boıynsha keńesshiler baza arqyly olarǵa jumys usynady.

«Atameken» qoldaý ortalyǵy jumyspen qamtýdyń mobıldi ortalyǵyn ashpas buryn Qordaı aýdanynda saýalnama júrgizdi. Onyń qorytyndysy boıynsha, jergilikti kompanııalarǵa satýshy, baqtashy, júrgizýshi, satý jónindegi menedjer, tiginshiler, traktorıst-mehanızatorlar, jumysshylar, saýynshylar, janarmaı quıý stansalarynyń operatorlary qajettigi anyqtaldy. Olardyń ortasha aılyq eńbekaqysy - 42 000-90 000 teńge aralyǵynda», – dedi Oljas Qarjaýov.

Jobanyń taǵy bir ereksheligi - jumys isteý formatynda. Ár ortalyqta 3 menedjer jáne 1 jeke qabiletti damytý keńesshisi qyzmet kórsetedi. Jeke qabiletti damytý keńesshisi anaǵurlym laıyqty mamandyqty anyqtaý maqsatynda testileý ótkizedi, qandaı daǵdylardy damytý qajettigin aıtady.

Osy rette «Atameken» qoldaý ortalyǵy komandasy adamdardy qabyldap qana qoımaı, sondaı-aq turaqty túrde halyqqa jaqyn bolyp, aýyldardy aralap, úı-úıge baryp, turǵyndarǵa jumyspen qamtý sharalary týraly aqparat beredi.