Qordaı oqıǵasy: 19 polıtsııa qyzmetkeri zardap shekti
8 aqpanda qaqtyǵystyń aldyn alý jáne ony oqshaýlaý úshin oqıǵa oryndaryna alǵashqylardyń biri bolyp Jambyl jáne Almaty oblysy polıtsııa departamentiniń jedel áreket etý arnaıy jasaǵynyń qyzmetkerleri keldi.
Tártipsizdik kezinde 19 qyzmetker túrli dene jaraqatyn alǵany, 9 -y- atys kezinde jaraqattanǵany belgili boldy. Arnaıy jasaq ınspektorlarynyń birininiń beti men sol aıaǵyna oq tıgen. Taǵy bir jasaq ınspektory -eki sannyń joǵarǵy jartysynan jaraqat aldy. Jaǵdaı turaqtalyp, polıtseıler baqylaýǵa alǵannan keıin, qyzmetkerler ortalyq aýdandyq aýrýhananyń qyzmetine júgindi.
Qorǵanys quraldary men oq ótkizbeıtin arnaıy kıimderdiń (bronejılet) arqasynda qaqtyǵys kezinde alǵan jaraqattar sanaty adam ómirine asa qaýipti emes ekeni anyqtaldy. Zardap shekkenderdiń kópshiligi alǵashqy medıtsınalyq kómek alǵannan keıin qatarǵa qosylyp, qyzmetterin jalǵastyrýda.
Almaty oblystyq polıtsııa departamenti bastyǵynyń birinshi orynbasary Serik Júnisbekov jaraqat alǵandardyń qatarynda. Oǵan jasalǵan operatsııa sátti shyǵyp, qazirgi ýaqytta densaýlyǵyna qaýip tónip turǵan joq. Qylmystyq kodekstiń 380-baby (Bılik ókiline qatysty kúsh qoldaný) boıynsha sotqa deıingi tergeý júrgizilýde .
Eske salaıyq, 7 aqpan kúni Jambyl oblysynyń Qordaı aýdanyndaǵy Masanchı aýylynyń turǵyndary arasynda jappaı tóbeles boldy. QR Prezıdenti Qasym-Jomart Toqaev buzaqylyq sıpattaǵy jappaı tóbelesti arandatýshylar órshite túskenin málimdedi.
Sondaı-aq vıtse-premer Berdibek Saparbaevtyń tóraǵalyǵymen úkimettik komıssııa qurylatynyn, qaza bolǵandardy jerleý, zardap shekkenderge kómektesý jumystary uıymdastyrylatynyn, qoǵamdyq tártipti buzǵandar anyqtalyp, qatań jaýapqa tartylatynyn málim etti. Bas prokýratýraǵa, Ulttyq qaýipsizdik komıtetine tıisti tapsyrma berildi.
foto: polisia.kz