Qordaı dárigerleri tize býyndarynyń patologııasyna artroskopııany qoldana bastady

<p>Qordaı aýdandyq ortalyq aýrýhanasynda alǵash ret 95 jyldyq tarıhta joǵary tehnologııalyq medıtsınalyq qyzmetter &ndash; tize býyndarynyń patologııalary kezinde artroskopııa kórsete bastady, dep habarlaıdy QazAqparat Densaýlyq saqtaý mınıstrligine silteme jasap.</p>

Tájirıbe almasý úshin Qordaı AOA-ǵa Taraz qalasynyń qalalyq kópbeıindi aýrýhanasynyń mamandary - travmatologııa bólimshesiniń meńgerýshisi Erlan Tóleev jáne ortoped-dáriger Qaıyrjan Qutymtaı shaqyryldy.

Mamandar Qordaı dárigerlerimen - hırýrgııa bólimshesiniń meńgerýshisi Nurlan Jaqsymbaevpen jáne travmatolog dáriger Alı Gasanovpen birlesip, úsh patsıentke tize býyndaryna hırýrgııalyq aralasýdy sátti júrgizdi.

E. Tóleev habarlaǵandaı, tize artroskopııasy – endoskopııalyq hırýrgııa. Ol egjeı-tegjeıli dıagnostıka úshin de, ártúrli býyn jaraqattaryn hırýrgııalyq emdeý úshin de taǵaıyndalýy múmkin. Bul ádis pýnktsııalyq portaldardy qoldana otyryp, býyndy jabyq túrde joǵary sapaly tekserýge jáne emdeýge múmkindik beredi, bul hırýrgııalyq jaraqattyń dárejesin edáýir azaıtady, aýyrsynýdy basady jáne qalpyna keltirý kezeńiniń ýaqytyn edáýir qysqartady.

Artroskop «kóretin» barlyq qurylymdar ekranda «tiri» túrinde kórsetiletinin jáne keskin birneshe ret úlkeıtilgen formatta túsetinin eskertemiz. Dáriger jaraqattyń nemese degeneratıvti ózgeristerdiń naqty ornyn taba alady, patologııanyń sıpatyn, aýyrlyǵyn anyqtaı alady jáne áreket ete alady.

Artroskopııa dıagnostıkanyń kez kelgen tásilinen asyp túsetini dáleldendi. Ol súıek qosylysynyń barlyq qurylymdyq birlikterin ishki jaǵynan eń usaq bólshektermen anyq kórsetedi. Artroskopııadan keıin qalpyna keltirý kezeńiniń uzaqtyǵy ashyq qol jetkizý operatsııasyna qaraǵanda aıtarlyqtaı az. Ortasha alǵanda, bul shamamen 24 aptaǵa sozylady jáne ártúrli is-sharalardy oryndaýdy qamtıdy.

«Bul sharalarǵa antıbıotıkalyq terapııa, gemostatıkalyq emdeý, tize úshin fýnktsıonaldyq tynyshtyq, fızıoterapııa, sondaı - aq tize býynyna júktemeni birtindep arttyra otyryp, arnaıy gımnastıkalyq jattyǵýlar jasaý arqyly asqynýlardyń damýyn boldyrmaý kired», - dedi Erlan Tursynáliuly.

Aýdandyq ortalyq aýrýhananyń bas dárigeri Záýresh Qadyrbekovanyń aıtýynsha, qalalyq kópbeıindi aýrýhana mamandarynyń kómegimen Qordaı AOA bazasynda konsýltatsııalar, telemedıtsına jáne birlesken operatsııalar arqyly aýdan halqyna mamandandyrylǵan joǵary tehnologııalyq kómek kórsetý sapasyn jaqsartý úshin travmatologııany odan ári damytýǵa nıetti.