Qordaı aýdanyna alǵashqy gýmanıtarlyq kómek jetti
Telearnanyń habarlaýynsha, qazir aýdanda jaǵdaı qalypty. Quqyqqorǵaý organdary, Ulttyq ulan sarbazdary, tótenshe jaǵdaı salasynyń qyzmetkerleri tynyshtyqty kúzetýde. Sondaı-aq ótken túni Sortóbe aýylyna alǵashqy gýmanıtarlyq kómek kelip jetken. Ony Jambyl aýdany Jalpaqtóbe aýylynyń turǵyndary erikti túrde jınaǵan. 5 tonna un, 1,5 tonna maı, 2 tonna qant, 2 tonna kúrish, balalarǵa jaıalyqtar, jyly kıimder, 10 myń dana dári-dármek shtabqa túsirildi.
«Endi, qajet bolǵan jaǵdaıda kómekke muqtaj jandarǵa taratý sharalary uıymdastyrylady. Búgin keshke deıin turǵyndar tarapynan qosymsha taǵy 10 tonnaǵa jýyq azyq-túlik, turmysqa qajetti zattar jetkiziledi dep kútilýde. Sondaı-aq búgin mektep, balabaqshalar jumys isteı bastaıdy. Keshe bilim oshaqtary men mektepke deıingi bilim mekemeleri balalardy qabyldaýǵa ázirlendi. Qazir aýdandyq bilim bóliminiń mamandary mektepterdi aralap, jaǵdaıdy kórip, baǵamdap qaıtpaq», - dep habarlady telearna.
Eske salaıyq, 7 aqpan kúni Jambyl oblysynyń Qordaı aýdanyndaǵy Masanchı aýylynyń turǵyndary arasynda jappaı tóbeles boldy. QR Prezıdenti Qasym-Jomart Toqaev buzaqylyq sıpattaǵy jappaı tóbelesti arandatýshylar óz paıdasyna qoldanbaq bolǵanyn málimdedi.
Sondaı-aq vıtse-premer Berdibek Saparbaevtyń tóraǵalyǵymen úkimettik komıssııa qurylatynyn, qaza bolǵandardy jerleý, zardap shekkenderge kómektesý jumystary uıymdastyrylatynyn, qoǵamdyq tártipti buzǵandar anyqtalyp, qatań jaýapqa tartylatynyn málim etti. Bas prokýratýraǵa, Ulttyq qaýipsizdik komıtetine tıisti tapsyrma berildi.
Tártipsizdikter keıin Qordaı, Aýqatty, Sortobe eldi mekenderinde de bolǵan.
8 aqpan kúni Іshki ister mınıstri Erlan Turǵymbaev pen Aqparat jáne qoǵamdyq damý mınıstri Dáýren Abaev oqıǵaǵa qatysty elordadaǵy Ortalyq kommýnıkatsııalar qyzmetinde baspasóz máslıhatyn ótkizdi. Málim etilgendeı, janjalǵa basqa aýyldardan kelgen 300-den astam adam qosylǵan. Eki jaq bir-birine tas laqtyryp, taıaqpen uryp, qarý qoldanǵan. Oqıǵa ornynda 8 adam, aýrýhanada 2 adam kóz jumdy.
9 aqpan saǵat 11.00-degi málimet boıynsha, medıtsınalyq kómekke 165 adam júgingen. Turǵylyqty jeri boıynsha medıtsınalyq uıymdarǵa - 140 adam, Qyrǵyzstandaǵy medıtsınalyq uıymǵa - 25 adam jetkizildi. «Qazaqstandaǵy aýrýhanaǵa jatqyzylǵandardyń ishinde turaqty aýyr jaǵdaıda 30 adam, al asa aýyr jaǵdaıda 8 adam bar. Qaıtys bolǵandardyń sany – 10. Oqıǵa ornynda 8, al taǵy 2 adam medıtsınalyq mekemede qaıtys boldy. Qazirgi tańda áli 8 adam jansaqtaý bóliminde jatyr», - dedi Densaýlyq saqtaý vıtse-mınıstri Lázzat Aqtaeva.
Janjaldarǵa qatysy bar degen kúdikpen 47 adam ustalyp, polıtsııa bólimine jetkizildi. Olardan eki ańshy qarýy tárkilendi. Keıin olardyń 44-i bosatyldy.
QR Qylmystyq kodeksiniń 272-baby (jappaı tártipsizdikti uıymdastyrý jáne soǵan qatysý) jáne 99-baby (kisi óltirý) boıynsha sotqa deıingi tergeý amaldary júrgizilýde.
Qordaı aýdanynda tótenshe jaǵdaı jarııalandy. Berdibek Saparbaev basshylyq etken úkimettik komıssııa aýdan turǵyndarymen kezdesti, Qordaı aýdanynda túngi qaýipsizdiktiń qamtamasyz etilýin tekserdi, etno-mádenı birlestik basshylarymen júzdesti, qaza tapqandardyń úıine baryp, kóńil aıtty. Zaqymdalǵan nysandardy qalpyna keltirý jumystary bastaldy.
QR ІІM málimetinshe, Qordaıdaǵy jappaı tártipsizdik kórshiles eki aýyl turǵyndary arasynda bastalǵan.
«Áý basta, ıaǵnı 5 aqpanda eki aýyldyń turǵyndary ustasyp qalǵan. Turmystyq qaqtyǵysqa qatysqandardyń biri qazir ustalyp, qalǵandary aýdannan shyqpaıtyny jóninde qolhatpen bosatyldy. Aýyr júk kóligi úıden shyǵyp kele jatqan kezde jolda kele jatqan avtokólikpen jolǵa talasyp qalǵan.Kólikterde úsh-úsh adamnan bolǵan. Aqyry ózara janjal sońy tóbeleske ulasyp ketken», - dedi ІІM orynbasary Alekseı Kalaıchıdı OKQ-da.
Sondaı-aq ol jol ústinde tóbelesken alty kisiniń arasynda egde jastaǵy adamnyń bolǵanyn rastady. «Ol tóbeles kezinde zardap shekken... Jalpy qazir biz barlyq taraǵan aqparatqa taldaý júrgizip otyrmyz. Ol jerde júzge tarta adam bolǵan. Olardyń árqaısysynyń sol jerge kelý motıvin zerttep jatyrmyz», - dedi ol.