Qordaı aýdany el ekonomıkasyna eleýli úles qosyp otyr – ákimdik

NUR-SULTAN. QazAqparat – Jambyl oblysy ákiminiń orynbasary Erjan Jylqybaev Qordaı aýdanynyń ınvestıtsııalyq tartymdylyǵy jóninde áńgimeledi, dep habarlaıdy QazAqparat tilshisi.

«2020 jyldyń 1 mamyrynda Qordaı aýdany boıynsha memlekettik bıýdjetke 2 mlrd teńgeden astam qarajat túsken. Mundaǵy ónerkásiptik óndiris kólemi 5,6 mlrd teńgeni quraǵan nemese ótken jylmen salystyrǵanda 103% artqan», - dedi Erjan Jylqybaev Ortalyq kommýnıkatsııalar qyzmetinde ótken onlaın baspasóz máslıhatynda.

Spıkerdiń aıtýynsha, aýdanda ınvestıtsııa tartý jumystary da belsendi júrgizilip keledi.

«Aldaǵy bes jylda – 2020-2025 jyldar aralyǵynda jalpy somasy 317 mlrd teńgege 11 ınvestıtsııalyq jobany iske asyrý josparlanǵan. Bul da óz kezeginde aýdan men oblys ekonomıkasyn damytýǵa, qosymsha jumys oryndaryn ashýǵa edáýir yqpal etedi», - dedi E. Jylqybaev.

Buǵan deıin spıker aýdanda zardap shekken 65 nysannyń 54-inde qalpyna keltirý jumystary bastalǵanyn habarlady.

Asyraýshysynan aıyrylý jaǵdaıyna baılanysty, qaıtys bolǵan jandardyń otbasylaryna aı saıyn orta eseppen 55 myń teńge áleýmettik járdemaqy taǵaıyndalyp, tólenip jatyr.

Sonymen birge, jyl sońyna deıin aýdanda jol jóndelip, gaz qubyry tartylady. Jańa mektepter men turǵyn úıler salynady.

Eske sala ketsek, 7 aqpan kúni Jambyl oblysy Qordaı aýdanyndaǵy Masanshy aýylynyń turǵyndary arasynda jappaı tóbeles boldy.

Oqıǵa ornynda 8 adam, aýrýhanada 2 adam kóz jumdy.

Jambyl oblysynyń Qordaı aýdanynda ultaralyq tatýlyq pen kelisimdi saqtaý jáne nyǵaıtýǵa baǵyttalǵan «Beıbitshilik pen kelisim» atty jańa joba qol alyndy.