Kópvektorly baǵdarlamalyq qujat: Astanalyqtar Prezıdent Joldaýyn talqylap jatyr
Talqylaý Belsendi uzaq ómir súrý ortalyǵynda ótti. Ardagerler men zeınetkerler elimizdiń strategııalyq jospary týraly pikir almasty, sondaı-aq Qazaqstannyń áleýmettik-ekonomıkalyq damýyn josparlaý boıynsha keıbir usynystaryn jetkizdi. Jıyndy ortalyq dırektory Muhtar Erketaev júrgizdi.
Ol Prezıdent óz Joldaýynda pandemııa kezinde óńirlik saıasat, medıtsına, ekonomıka, saıası jańǵyrtý, medıtsınalyq kómektiń qoljetimdiligi men tıimdiligi máselelerine kóp kóńil bólgenin atap ótti.
«Memleket basshysynyń eń tómengi jalaqyny kóterý týraly bastamasy bizdi erekshe qýantty, ol túrli salalarǵa áser etedi jáne kóptegen qazaqstandyqtyń tabysynyń ósýine aıtarlyqtaı áser etedi, demek, ulttyń ál-aýqatynyń deńgeıi artady. Biz Prezıdenttiń azyq-túlik baǵasyn ustap turýǵa, densaýlyq saqtaý júıesin damytýǵa, memlekettik qyzmetterdi onlaın formatqa aýystyrýǵa, jańa mektepter salýǵa jáne azamattardyń áleýmettik jaǵdaıyn jaqsartý jónindegi basqa da naqty mindetterin Úkimet basshylyqqa alýy tıis dep sanaımyz», - dedi Muhtar Erketaev.
Jıynǵa qatysýshylar Prezıdent Joldaýy – memlekettik apparatty, qoǵamdyq protsesterdi, ishki jáne syrtqy saıasatty jan-jaqty damytý jónindegi mindetterdi kórsetetin ýaqtyly jáne kópvektorly baǵdarlamalyq qujat degen pikir bildirdi.
Túptep kelgende olardyń bári qazaqstandyqtardyń jaqsy jáne jaıly ómir súrýine baǵyttalǵan.
Sonymen qatar, olardyń tabysty jáne tıimdi iske asyrylýy árbir qazaqstandyqqa baılanysty.
Ardagerler sondaı-aq, Joldaýdyń negizgi qaǵıdalaryn halyq arasynda túsindirý jumysyn jalǵastyratynyn atap ótti.
Odan bólek, «Ortalyqtandyrylǵan kitaphanalar júıesiniń» qyzmetkerleri de Prezıdent joldaýynda aıtylǵan basym baǵyttardy, sonyń ishinde mádenıet salasyna baılanysty qozǵalǵan taqyryptardy talqylady .
Jıynǵa Nur-Sultan qalasyndaǵy 18 kitaphananyń mamandary, memlekettik organdardyń qyzmetkerleri, qoǵam qaıratkerleri qatysty.
Joldaý júktegen mindetterdi túgendegen mádenıet salasynyń qyzmetkerleri aldaǵy ýaqytta iske asyrýǵa tıis jumystar jaıyn talqylady.
Memleket basshysy Joldaýda 2022-2025 jyldary mádenıet qyzmetkerleriniń, muraǵatshylardyń, kitaphanashylardyń, tehnıkalyq qyzmetkerlerdiń, qoryqshylardyń, kólik júrgizýshileriniń jáne ózgelerdiń jalaqysyn jyl saıyn orta eseppen 20 paıyzǵa ósirýdi tapsyrdy.
Eńbekaqynyń ósýi – bizdiń jumysymyzǵa serpin beredi, deıdi kitaphanashylar.
«Joldaýda aıtylǵan ózekti máselelerdiń bári biz úshin mańyzdy. Ásirese, bilim salasyn kóterýge erekshe kóńil bólindi. Bul jolda biz de aıanbaı eńbek etip júrmiz jáne bilim salasynyń ary qaraı damýyna úles qosýǵa daıynbyz. Al Prezıdenttiń jalaqymyzdy kótergenin mártebemizdi ósirgeni dep túsinemiz», - deıdi «Ortalyqtandyrylǵan kitaphanalar» júıesiniń basshysy Gúlbadan Madıbaeva.
Jıynda mádenıet salasynyń maıtalmandary Joldaýdaǵy negizgi baǵattary boıynsha pikir almasty. Saladaǵy ózekti máseleler kóterildi. Joldaýda qozǵalǵan taqyryptar boıynsha baıandama jasaldy.
«Ortalyqtandyrylǵan kitaphanalar» júıesinde 18 kitaphana bar. Onda barlyǵy 126 kitaphanashy jumys istese, sonyń 60 paıyzy 25 jyldan beri eńbek etip keledi. Qoǵam qaıratkeri Sádibek Túgel de mádenıet qyzmetkerlerine kóńil bólingenin der kezinde qabyldanǵan sheshim dep sanaıdy.
«Bul joldaýda memlekettiń damýynyń barlyq salalary qamtylǵan. Ásirese, zııaly qaýymǵa kóńil bólgeni durys boldy. Endi bizdiń mindet – osy Joldaýda aıtylǵan dúnıelerdi oryndaý, halyqqa jetkizý. Al kitaphana qyzmetkerleriniń jalaqysyn 20 paıyzǵa kótergeni, bul aldymen kitaphanashylarǵa degen qurmet. Sebebi, kitaphana – rýhanııattyń, tazalyqtyń ordasy. Ol - zııaly qaýym men oqyrmandardyń basy toǵysatyn jer. Bir jaǵynan, bul kitaphanashylarǵa úlken jaýapkershilik júkteıdi», - dedi ol.
Іs-shara barysynda kitaphanashylalyr bizdiń negizgi maqsatymyz – jańa joldaýdy qoldaı otyryp, ár oqyrmannyń júregine jetkizý, sapaly aqparattyq qoldaý kórsetip, jastardyń bilimin jetildirý degen pikir bildirdi.
Aıta keteıik, is-sharalar sanıtarlyq normalar men talaptardy saqtaı otyryp ótkizildi.