Kópten kútken ózgeris: Semeı turǵyndary jańadan qurylatyn Abaı oblysy jaıly ne deıdi
ıAdrolyq medıtsına jáne onkologııa ortalyǵynda dáriger bolyp jumys isteıtin Áıgerim Qaıyrhanovanyń aıtýynsha, Abaı oblysynyń qurylýy - Semeı qalasynyń bolashaǵy úshin jasalǵan mańyzdy qadam.
«Prezıdenttiń el Shyǵysynda jańa oblys ashyp, Semeı onyń ortalyǵy bolatynyn aıtqanyn estigende qatty qýandym. Endi óshkenimiz janyp, joǵaltqanymyzdy taýyp, halyqtyń jaǵdaıy jaqsara túsedi degen úmittemin. Joldarymyz jóndelip, jańa óndiris oryndary ashylyp, azamattar jumyspen qamtylsa nur ústine nur» - dedi ol.
Al Shákárim atyndaǵy ýnıversıtet stýdenti Aqkerbez Orashtyń aıtýynsha, jańa oblystyń qurylýy birinshi kezekte jastarǵa jańa múmkindikter syılaıdy.
«Prezıdenttiń bul Joldaýy elimizdegi úlken ózgeristerge jol bastaıdy dep senemin. Qazaqstanda 3 birdeı jańa oblys qurylmaq. Abaı, Ulytaý, Jetisý óńirleriniń ashylatyny jergilikti turǵyndar úshin óte jaǵymdy jańalyq boldy. Alashtyń astanasy – Semeı qalasy ortalyǵy bolatyn hákim Abaıdyń esimine beriletin oblystyń turǵyny, shejireli Shyǵystyń týmasy retinde óte qýanyshtymyn. Oblys mártebesi qalyń jurtshylyqtyń kókeıinde júrgen arman edi», - dedi Aqkerbez.
Onyń sózinshe, endi osy kúnge deıin eldiń rýhanı astanasy sanalǵan qalanyń kórkine jańa óń kirmek.
«Qasym-Jomart Kemeluly halyqqa jasaǵan ár úndeýinde jastarǵa basymdyq berý kerektigin atap ótedi. Endi jastarǵa arnalǵan jańa múmkindikter paıda bolatynyna ras. Oblys aýmaǵynda memlekettik baǵdarlamalar sany artyp, jastardyń tarapynan kreatıvti kóptegen jobalar uıymdastyrylady. Sondaı-aq turǵyn úı, jol, jaryq máseleleri óz sheshimin tabady degen oıdamyz. Qalanyń ınfraqurylymy men ekonomıkalyq jaǵdaıy da ózgeretini sózsiz», - dedi qala turǵyny.
Óz sózinde ol tarıhy tereńde jatqan aımaqty basqarýǵa bilimdi de bilikti basshy taǵaıyndalady degen senim bildirdi.
«Semeılik jerlesterime aıtarym, týǵan jerimizdiń kórkeıýine barlyǵymyz birge úles qosaıyq. Elimizdiń bereke-birlikte bolýy, damı túsýi bizdiń qolymyzda. Egemendi memleketimizdiń Táýelsizdigi máńgi bolsyn!», - dedi A.Orash.
Semeılik jýrnalıst Leıla Slıambekova jańa oblys qurylatynyn alǵash qulaǵy shalǵanda qandaı áserde bolǵanyn aıtyp berdi.
«Bul jańalyqty estigende qýanyshym qoınyma syımady. Sebebi Semeı qalasynda túıini tarqatylmaı kele jatqan máseleler az emes. Onyń biri – halyqtyń jumyssyzdyǵy. Shynyn aıtqanda, osynyń saldarynan kóptegen turǵyndar basqa qalalarda jumys isteýge májbúr boldy. Endi olar týǵan jerine qaıta oralady», - dedi ol.
Leılanyń aıtýynsha, Semeıde jastar kóp. Olarǵa tıisti jaǵdaı jasalyp, jańa jumys oryndary ashylsa quba-qup.
«Jastar damysa, keleshekte shahardyń órkendeıtindigi anyq. Sebebi bolashaq – jalyndaǵan jastardyń qolynda. Qoryta aıtqanda, Abaı oblysynyń qurylatyny bizge sol bolashaqqa degen úlken úmit syılady», - dedi L. Slıambekova.
Órt sóndirýshi Meıir Áshimhannyń sózinshe, jańa oblysqa Abaı atynyń berilýi óte durys sheshim boldy.
«Byltyr 175 jyldyǵy keń kólemde atap ótilgen Abaı Qunanbaıuly qazaqtyń uly perzenti. Onyń esimi oblysqa berilýin qos qoldap qoldaımyn. Osy ózgerister Semeı qalasyn damytady degen senimdemiz. Kósheler abattandyrylyp, joldar jóndelip, qala irgesindegi eldi mekenderge jaryqtar tartylsa degen tilegimiz bar», - dedi semeılik.
Al esepshi Ádemi Aqashova Memleket basshysynyń Semeıdi jeke oblys qylyp shyǵarýy qala halqynyń kópten kútken tilegin oryndaǵanyn tilge tıek etti.
«Qalamyzda zaýyttar, kásiporyndar salynyp, jumyssyzdyq máselesi sheshimin tabýy tıis. Eger jańa múmkindikter paıda bolsa jastar eshqaıda ketpeı, osynda qalady. Sondaı-aq meniń oıymsha, osy kóne shahardyń tarıhy jaıly syr shertetin nysandar da ashylýy tıis», - dedi qala turǵyny.
Ádeminiń aıtýynsha, semeılikter aldaǵy ýaqytta basqa da jaqsy jańalyqtar kútedi.