Kópshilik volonterlikti «tegin jumys kúshi» dep oılaıdy – Bogdan Petrov
Bogdan Petrov – M.Qozybaev atyndaǵy SQMÝ «Jýrnalıstıka» mamandyǵynyń magıstranty. 2014 jyly onyń esimi «Qazaqstan úmiti» kitabyna engizildi. Belsendi jas 2017 jyly M.Qozybaev atyndaǵy SQMÝ Jastar isi jónindegi komıtetin basqarǵan. Búginde joǵary oqý ornyndaǵy Qazaqstan halqy Assambleıasy kafedrasynyń ǵylymı-ádistemelik keńesiniń múshesi. Qazaq jáne orys tilderinde erkin sóıleıdi.
- Soltústik Qazaqstan oblysynda volonterlik qozǵalys qandaı baǵyttarda damýda?
- Volonterlik uǵymy endi-endi qulaqqa sińisti bolyp jatqanymen, olardyń atqaryp júrgen jumysy bizdiń qoǵamǵa jat emes. Buryn «Tımýrshylar otrıady» boldy. Jalǵyzilikti, kómekke muqtaj jandarǵa qol ushyn berdi. Budan basqa únemi senbilikter, qaıyrymdylyq is-sharalary uıymdastyrylyp turady. Oǵan qanshama adam qatysyp, óz úlesin qosyp keledi. Sol sebepti árqaısymyz az da bolsa – volontermiz. Jalpy M.Qozybaev atyndaǵy SQMÝ volonterlik qozǵalys byltyr quryldy. Bastapqyda tek 100 adam ǵana bolsa, qazir qatarymyz kún saıyn artyp keledi. Budan basqa óńirdegi kolledjderde, mektepterde bar. Sondaı-aq, oblystyq jastar resýrstyq ortalyǵy janynda volonterler klýby jumys isteıdi. Osy klýbpen tyǵyz baılanystamyz.
- Volonterlerdiń belgili bir daıyndyǵy bolýy qajet sekildi, bul másele qalaı sheshimin taýyp jatyr?
- Júıeli túrde volonterler úshin semınarlar, trenıngterdi uıymdastyramyz. Sondaı-aq, olar úshin nusqaýlyq jasadyq. Budan basqa volonterlerimiz basqa qalalarǵa baryp, respýblıkalyq, halyqaralyq dárejedegi is-sharalarǵa qatysyp, bilim deńgeılerin arttyrady, tájirıbe jınaqtap keledi. Máselen byltyr Omby qalasynda memleket basshylarynyń qatysýymen ótken Qazaqstan men Reseıdiń XVI aımaqaralyq yntymaqtastyq forýmyna volonterlerimiz de baryp, at salysty. Jastar jyly aıasynda Ulttyq volonterlik jeli atynan «Ashyq júrek» respýblıkalyq baıqaýynda is-sharalardy ótkizýge shaǵyn grantty jeńip aldyq. Birinshiden, ol - áleýmettik tájirıbe. Adamdarmen aralasyp, is-sharalardy uıymdastyrý arqyly óz boıyńda keleshek ómirde qajet bolatyn daǵdylardy qalyptastyryp, damytýǵa septigi zor.
- Búginde volonter bolý tıimdi me?
- Árıne, tıimdi. Jańa aıtqanymdaı eń aldymen ol - úlken tájirıbe. Ári Prezıdentimiz bıylǵy jyldy «Volonterler jyly» dep belgilegendikten eriktilerdiń jumysy erekshe baǵalanbaq. Mysaly, volonter-stýdentterdiń shákirtaqysy joǵary bolady, atqarǵan jumystary eńbek ótiline kiredi. Keshe respýblıkalyq front-ofıstiń ashylý saltanatynda Prezıdentimiz volonterlerge arnaıy jeńildikter bolatynyn basa aıtty. Tipti eńbegimen erekshelengen eriktiler memlekettik nagradalarǵa usynylmaq.
Jalpy, volonterlik qozǵalysty jetildirý úshin adamdardyń sanasyn ózgertýimiz qajet. Óıtkeni qazirgi ýaqytta kópshilik volonterlikti «tegin jumys kúshi» dep esepteıdi. Durys túsinbegendikten de volonterlikpen aınalyspaıdy. Biz jurttyń túsinigin ózgertýge tyrysamyz. Volonterlikke eń bastysy adam óz erkimen, júreginiń qalaýymen kelýi qajet.
- Bıylǵa qandaı jospar bar?
- Jospar kóp. Ýnıversıtette qazir volonterler úshin biryńǵaı formany engizemiz. Volonterlik kitapshalardy tsıfrlandyrmaqshymyz. Sondaı-aq, volonterler úshin arnaıy kartalardy daıyndaımyz. Osy kartalar arqyly olar dúkenderde, dámhanalarda jáne t.b. qoǵamdyq oryndarda jeńildikter alatyn bolady. Jalpy Prezıdent Q.Toqaevpen bolǵan kezdesýden alǵan áserim keremet. Volonterler jylynda atqarylýy tıis jumystar saralandy. Bizge volonterlikti keńinen taratý mindeti tur. Keremet josparlar bar. Árbir oblysta jaqsy tájirıbe bar. Negizi osy is-shara tájirıbe almasýǵa paıdaly. Biz óz oblysymyzǵa kelip, eń jaqsy ıdeıalardy ózimizde júzege asyrýǵa daıynbyz.
- Іsterińizge sáttilik tileımin! Suqbatyńyzǵa rahmet!