Kóppáterli turǵyn úıdi basqarýdyń jańa formasyna qalaı kóshý kerek
Aıta keteıik, 2020 jyldyń basynan bastap «Keıbir zańnamalyq aktilerge turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» QR Zańy kúshine endi. Bıylǵy 22 aqpandaǵy jaǵdaı boıynsha kóppáterli turǵyn úıdi basqarý boıynsha 1 735 uıym qurylǵan.
«Múlik ıeleriniń birlestigin nemese jaı seriktestikti qurý rásimi zańda jáne normatıvtik quqyqtyq qujattarda qarastyrylǵan. Bul rette basqarýdyń jańa formalaryna ótý qıyndyq týdyrmaıdy. Eń bastysy páterlerdiń, turǵyn emes úı-jaılardyń ıeleri belsendilik tanytyp, jınalys uıymdastyryp, múlik ıeleriniń birlestigin nemese jaı seriktestik qurý týraly sheshim qabyldaýy qajet», - dedi E. Daýylbaev Ortalyq kommýnıkatsııalar qyzmetinde ótken baspasóz máslıhatynda.
Sonymen birge, spıker basqarýdyń jańa formalaryna kóshý algorıtmin baıandady.
«Eń aldymen jınalysty ótkizýge bastamashylyq jasaý. Qatysýshylardyń sany páterler men turǵyn emes úı-jaılar ıeleriniń 10 paıyzynan kem bolmaýy tıis. Kópshilikke qoljetimdi jerlerde ótkiziletin jınalys týraly habarlandyrý 10 kún buryn jarııalanýy qajet. Sondaı-aq, páter ıelerine, turǵyn emes úı-jaılarǵa jınalys týraly jeke nemese elektrondyq poshta nemese uıaly baılanys arqyly habarlaýǵa bolady. Jınalys barlyq menshik ıeleriniń keminde 50% kvorýmmen qamtamasyz etilýi kerek jáne sheshimder qatysýshylardyń kópshiliginiń kelisimimen qabyldanady. Eger jınalysqa qatysýǵa kvorýmdy qamtamasyz etý múmkin bolmaǵan jaǵdaıda, jazbasha saýal júrgizý týraly sheshim hattamamen tirkeledi jáne jazbasha saýaldy júrgizý ýaqyty bekitiledi», - dep tolyqtyrdy E. Daýylbaev.
Jazbasha saýalnama paraǵy jarııalanǵan kúnnen bastap 7 kúntizbelik kún ishinde árbir menshik ıesine qolma-qol ne elektrondyq poshta arqyly jiberiledi. Jazbasha saýalnama, jınalys jarııalanǵan kúnnen bastap, 1 aıdan aspaıtyn merzimde júrgiziledi.
«Múlik ıeleri birlestigin memlekettik tirkeý úshin Halyqqa qyzmet kórsetý ortalyǵyna kelesi qujattardy tapsyrý qajet: ótinish; hattama (daýys berý paraqtarymen); Jarǵy (nemese Tıptik jarǵy) – 2 danadan memlekettik jáne orys tilderinde; memlekettik baj salyǵy (1 AEK). Karantındik sharalarǵa qaramastan, kóppáterli turǵyn úılerdiń bastamashyl turǵyndary múlik ıeleriniń birlestigin qurý boıynsha qajetti sharalar júrgizip, óz úılerin basqarýdy qolǵa alýda. Jınalǵan aqshany óz úıine jumsap, sapaly jáne maqsatty túrde paıdalanyp jatqan mysaldar da bar», - dedi E. Daýylbaev.
Eske sala ketsek, basqarýdyń eski formalary 2022 jyldyń 1 shildesine deıin óz qyzmetin jalǵastyrady. Osy merzim aıaqtalǵan soń Qazaqstan Respýblıkasynyń zańnamasynda belgilengen tártippen joıý rásimin júrgizýi tıis.