Kópqabatty úıdegi páter ıeleri jylý júıesinen bas tarta ala ma
Aıta ketsek, Irına Munarbaeva esimdi turǵyn QR Energetıka mınıstrine saýal joldaǵan.
««Adamdar turyp jatqan kópqabatty úıdiń birinshi qabatynda dúken bar. Ol dúkende jylý energııasyn tasymaldaýshynyń kelisiminsiz jylytý radıatory buzylǵan. Meniń qoıaıyn degen suraǵym: kópqabatty úıdegi belgili bir úıdiń ıeleri ózdiginen jylýmen qamtý qyzmetin óshire ala ma? Jylytý júıesi buzylǵan kópqabatty úılerge jylý energııasy berile me?», - deıdi ol.
Turǵynnyń suraǵyna jaýap bere kele Qanat Bozymbaev bul másele QR Energetıka mınıstriniń 2014 jyly №211 buıryǵynyń 63-bóligi 14-tarmaǵynda rettelgenin baıan etedi.
«Oǵan sáıkes, tutynýshyǵa jaýapty uıymnyń, jergilikti atqarýshy organǵa qarasty sáýlet jáne qala qurylysy basqarmasynyń qurylymdyq bólimshesiniń ruqsatynsyz páterishilik jelini, ınjenerlik qurylǵylardy qaıta jaraqtandyrýǵa ruqsat berilmeıdi. Jylý júıesi jumysyn kúsheıtý úshin osyndaı shekteý bar. Osynyń negizinde páter nemese úı-jaıdyń ıeleri óz qalaýymen jylý júıesi qyzmetinen bas tarta almaıdy. Erejeniń 55-bóligine sáıkes tutynýshy ótinim berilgen kelisimdegi mólsher men kommertsııalyq esep qurylǵysynyń kórsetkishi negizinde jylýmen qamtıtyn uıymmen tólem qujatyna sáıkes eseptesedi. Al kommertsııalyq esep qurylǵysy bolmaǵan jaǵdaıda tutynýshy men jylýǵa jaýapty uıym Qazaqstan Respýblıkasynyń tabıǵı monopolııasy salasyndaǵy zańnamaǵa sáıkes esep aıyrysady», - dep jaýap bergen Qanat Bozymbaev.