Kópbalaly otbasyna 2-3% nesıe Turǵyn úı qurylys jınaq banki arqyly beriledi

PETROPAVL. QazAqparat - "Nur Otan" partııasynyń XVIII sezinde Nursultan Nazarbaev tıisti mekemelerge turmysy tómen kóp balaly otbasylaryna 2-3% ıpotekalyq nesıe berý baǵdarlamasyn ázirleýdi tapsyrǵan bolatyn, dep habarlaıdy QazAqparat tilshisi.

Qoljetimdi baspana baǵdarlamasy memlekettik Turǵyn úı qurylys jınaq banki arqyly sáýirden bastap júzege asyryla bastaıdy.

Mamandardyń esebinshe, eger páterdiń quny 8 mln teńge bolsa, bastapqy 8 jylda nesıe alýshy aı saıyn 42 myń teńgeden, keıingi 11 jyl ishinde 27,400 teńgeden tólep otyrady. Bul - ázirshe joba ǵana.

«Elbasy «Nurly jer» baǵdarlamasy aıasynda turmysy tómen kópbalaly otbasylar úshin 40 myńnan astam jaldamaly páter salynatyndyǵyn atap ótti. Bul maqsatqa aldaǵy 7 jylda jyl saıyn qosymsha 50 mlrd teńge bólinbek. Sonymen qatar Memleket basshysy kópbalaly jáne tolyq emes otbasy, múmkindigi shekteýli balalary bar, sondaı-aq kirisi tómen otbasylarǵa baspana satyp alýdyń qoljetimdigin arttyrý qajettigin atap ótti. Turǵyn úı qurylys jınaq banki qazir jańa baǵdarlama ázirlep jatyr. Sáýir aıynan bastap júzege asyryla bastaıdy dep josparlap otyrmyz», - deıdi «Turǵyn úı qurylys jınaq banki» AQ SQOF bólim basshysy Ámir Nurmuqanov.