Kópbalaly otbasylarǵa jeńildetilgen kredıt berý júıesi engiziledi - Roman Sklıar

ASTANA. QazAqparat - Turǵyn úı qurylys jınaq banki arqyly kópbalaly otbasylarǵa 2 paıyzdyq jeńildetilgen kredıt berý júıesi engiziledi. Bul týraly búgin Úkimet otyrysynda «Nurly jer» baǵdarlamasy boıynsha baıandama jasaǵan QR Indýstrııa jáne ınfraqurylymdyq damý mınıstri Roman Sklıar aıtty, dep habarlaıdy QazAqparat tilshisi.

«Memleket basshysynyń «Nur Otan» partııasynyń sezinde bergen tapsyrmalaryn iske asyrý boıynsha Turǵyn úı qurylys jınaq banki arqyly kópbalaly otbasylar, múgedek balalary bar nemese múgedek bala tárbıelep otyrǵan otbasylar jáne tolyq emes otbasylarǵa 20 jylǵa deıin alǵashqy jarnasy 10 paıyz bolatyn jyldyq stavkasy 2 paıyzdyq jeńildetilgen kredıt berý júıesin engizý usynylady. Alǵashqy jarna retinde turǵyn úı sertıfıkatyn paıdalanýǵa múmkindik bar», - dedi ol.

Mınıstrdiń aıtýynsha, atalǵan mehanızmdi 3 jyl ishinde iske asyrý úshin jyl saıyn 50 mlrd teńgeden 150 mlrd teńge qajet bolady.

«Jyl saıyn 6 myń nesıe berý josparlanǵan. Sonymen qatar, ákimdikter tarapynan 2 myń páter satyp alý qamtamasyz etiledi. 3 rettik aınalym esebinen 25 jylda 56 myń kópbalaly otbasyǵa zaım beriledi», - dedi Roman Sklıar.