Kópbalaly otbasylarǵa arnalǵan ıpotekanyń aı saıynǵy tólemaqysy qandaı

ASTANA. QazAqparat - QR Indýstrııa jáne ınfraqurylymdyq damý mınıstrligi kópbalaly otbasylarǵa 2 protsenttik ıpotekany berý sharalaryn túsindirdi, dep xabarlaıdy QazAqparat tilshisi.

Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marxabat Jaıymbetovtiń aıtýynsha, Turǵyn úı qurylys jınaq bankinen 8 mıllıon teńge qaryzǵa alynsa, alǵashqy 8 jylda aı saıyn 42 000 teńgeden tóleý kerek. Al odan keıingi 11 jylda atalǵan soma 27 000 teńgege deıin tómendeıdi.

"Jeńildetilgen baspana nesıesine jańa páter, bolmasa, úı satyp alýǵa bolady. Jyldyq mólsherlemesi - 2 protsent. Ol 19 jylǵa beriledi. Sosyn 10 paıyz kóleminde alǵashqy jarna salý qajet. Endi, alǵashqy jarnaǵa aqsha joq degen másele týyndaıdy. Máselen, 10 mıllıon teńgeni qaryzǵa alsań, 1 mıllıon teńge kóleminde alǵashqy jarna qajet. Biz bul máseleni bylaı sheshýdi kózdep otyrmyz. Ákimdikter beretin turǵyn úı kýálikteri arqyly, bolmasa, iri kásiporyndardyń kómegimen alǵashqy jarnany alýǵa bolady. Máselen, Astana qalasy turǵyn úı kýálikterine 2 mıllıardtan astam qarjy bólemiz dep otyr. Sonyń kómegimen alýǵa bolady", - dedi M.Jaıymbetov búgin Astanadaǵy kópbalaly analarmen bolǵan kezdesýde.

Komıtet basshysynyń sózine qaraǵanda, jeńildetilgen kredıttiń eń joǵary somasy - 15 mıllıon teńge alynsa, ol otbasynyń tabysy 104 250 teńge bolýy qajet. Al 6 mıllıon teńgeniń qaryzyna 56 850 teńgeniń jalaqysy kerek.

"Mysaly, 6 mıllıon teńgeniń nesıesin alsańyz, onda alǵashqy 8 jylda aı saıyn 31 600 teńgeni tóleısiz. Odan keıingi 11 jylda 18 988 teńge tólep otyrý qajet. Buǵan bala sany tórt baladan kóp otbasylar qatysa alady. Sosyn múgedek balalary bar otbasylar men tolyq emes otbasylarǵa alýǵa múmkindik bar", - dep atap kórsetti M.Jaıymbetov.

Aıta keteıik, buǵan deıin QazAqparat tilshisi 2 protsenttik ıpotekanyń sharattaryn saraptap shyqqan bolatyn.