Kópbalaly otbasyǵa shaǵyn nesıe qalaı beriledi

NUR-SULTAN. QazAqparat - Kópbalaly otbasylarǵa jeke bıznes bastaý úshin shaǵyn nesıeler qandaı sharttarmen beriletindigi belgili boldy. Bul týraly búgin QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi vedomstvo baspasóz qyzmetine silteme jasap.

Onyń atap ótýinshe, Memleket basshysynyń kóp balaly analardy mıkro jáne shaǵyn bızneske tartý jónindegi tapsyrmasyn oryndaý maqsatynda «Eńbek» nátıjeli jumyspen qamtýdy jáne jappaı kásipkerlikti damytýdyń memlekettik baǵdarlamasyna túzetýler engiziledi. Onda jeńildikti sharttarmen ár túrli bıznes túrlerine kepil jáne mıkrokredıtter berilmesten qaıtarymsyz memlekettik granttar berý tetikteri kózdelgen.

«Biz mıkrokredıtter berý sharttaryn qaıta qaraımyz. Jańa bıznestiń turaqtylyǵyn qamtamasyz etý maqsatynda kóp balaly otbasylardyń jobalary úshin mıkrokredıt berý merziminiń ulǵaıtylýy usynylady. Kredıtti óteý boıynsha qarjylyq júktemeni tómendetý úshin biz nomınaldy syıaqy stavkasyn (qoldanystaǵy shema boıynsha 6%) tómendetýdi usynamyz», – dedi Birjan Nurymbetov.

Sondaı-aq ol jetkilikti kepil múlki joq otbasylar úshin mıkrokredıtterdi kepildendirý mehanızmderin aýyl men qalaǵa bólmeı, biryńǵaı operator arqyly taratý josparlanyp otyrǵanyn atap ótti. «Atameken» UKP fılıaldarynyń kóp balaly otbasylardyń bıznes-jobalaryn súıemeldeý merzimin ulǵaıtý (qazir 1 jyl) usynylady. Bul turaqty ósý traektorııasyna shyǵý úshin start-ap jobalaryn beıimdeýge múmkindik beredi.

«Kepil múlki jáne joǵary tabysy joq kópbalaly otbasylardy qoldaý memlekettik granttardy usyný arqyly, óteýsiz jáne qaıtarymsyz negizde 200 aılyq eseptik kórsetkish (505 myń teńge) mólsherinde kórsetiletin bolady. Bul olarǵa bastapqy kezeńde «qarapaıym bıznespen» aınalysýǵa múmkindik beredi», – dedi mınıstr.

Sondaı-aq, ol baǵdarlamanyń bıýdjettiń tıimdi shyǵyndalýyn arttyrýǵa baǵyttalǵan tetikteri qaıta qaralatyndyǵyn basa aıtty. Birinshi kezekte, oqytý tek jumys berýshilerdiń ótinimi boıynsha ǵana júrgiziledi. Baǵdarlamanyń nysanaly baǵyty azamattardy turaqty jumyspen qamtamasyz etýge negizdeledi.

«8 aıdyń qorytyndysy boıynsha Baǵdarlamanyń iske asyrylý barysynda mynadaı nátıjelerge qol jetkizildi. 402 myńnan astam adam Baǵdarlama qatysýshysy boldy. 280 myń adam, onyń ishinde 185 myńy nemese 66 paıyzy turaqty jumys oryndaryna turǵyzyldy. Qysqa merzimdi kýrstarǵa 32 myńnan astam adam jiberilip, onyń ishinde 16 myńy oqýdy aıaqtady, oqýdy aıaqtaǵan 6 myńnan astam adam jumysqa turǵyzyldy. Kásipkerlik negizderine oqytýmen 75 myń adamdy qamtý josparlanǵan bolsa, onyń 33 myńy qamtyldy. Baǵdarlamaǵa qatysýshy 8,5 myńǵa jýyq adam mıkrokredıtter, al 7 myńnan astam adam granttar aldy. Sýbsıdııalanatyn jumys oryndaryna 114 myńnan astam adam ornalastyryldy. Shamamen 6 myń adam nemese belgilengen jospardyń 62 paıyzy qonys aýdardy», – dedi Birjan Nurymbetov.

Bul rette, mınıstr jekelegen baǵyttar boıynsha keıbir óńirlerde Baǵdarlamanyń iske asyrylý qarqyny tómen ekendigin, sondyqtan óńirlerdiń ákimderinen osy baǵyttaǵy jumysty kúsheıtýin atap ótti.