Kópbalaly analarǵa kómektesý de saýap is - Dáýren Abaev
Mınıstrdiń aıtýynsha, din taqyrybyndaǵy medıaónim Qazaqstan qoǵamynda úlken suranysqa ıe.
«Halyq dintanýshy men ımamdardan, kásibı mamandardan din taqyrybyndaǵy san qyrly saýaldarǵa jaýap alǵysy keledi. Dinı salt-joralǵylardyń mánin tereńirek túsingisi keletinder de kóp. Mysaly, kóp adamdar ımamdardan saýap uǵymyn túsindirýdi surap jatady. El arasynda saýap alý úshin tek meshit nemese medrese salý kerek degen túsinik bar. Din ókilderiniń ózi saýapqa aǵash otyrǵyzý, mektep nemese jol salý sııaqty ıgi ister de jatatynyn aıtady. Olardyń pikirinshe, áýeli aınaladaǵy adamdardyń muqtajdyǵy eskerilýi tıis. Kópbalaly analarǵa kómektesý de saýaptyń bir túri» - dep túıindedi mınıstr.
Eske salsaq, Dáýren Abaev buǵan deıin de din taqyrybynda pikir bildirgen bolatyn.
«Zańdy jumys istep jatqan dinı birlestiktermen qazirgi tańda osynaý pozıtıvti tájirıbeni bekemdep, yntymaqty, konstrýktıvti ózara áreketti kúsheıte berý kerek. Bizge dintaný saraptamasyn júrgizýdiń tıimdiligin árdaıym arttyryp otyrý kerek dep esepteımiz. Bul jerde dinı mazmuny bar bilim jáne aqparattyq materıaldardy Konstıtýtsııaǵa jáne zańǵa saı kelýin tekserý týraly aıtylyp otyr», - degen edi mınıstr.