Kópbalaly analarǵa qandaı jaǵdaı jasalýda
Búgin Taldyqorǵan qalasynda oblystyń kópbalaly jáne jaǵdaıy tómen otbasylaryna jasalyp jatqan ıgi ister jaıly arnaıy brıfıngte baıandaldy.
«Bıyl Almaty oblysynda 672 páter kópbalaly analarǵa beriledi dep josparlanýda. Onyń 320 páteri osy Taldyqorǵan qalasynda beriledi. Bul buryn-sońdy bolmaǵan jaǵdaı. Alǵashqy baspana osy 1-shi maýsym balalar kúninen bastap berile bastaıdy. Kezekte turǵan turǵyndarǵa baspana berý bastalady. Odan keıin bizde «Kottedjdi qalashyq» bar. Ol jerden de úıler úlestiriledi. Bıyl 155 kottedj úıdiń qurylysy aıaqtalady. Onyń 70-i kópbalaly otbasylarǵa beriledi. Tek ǵana Taldyqorǵan qalasy emes, bizde aýdandar da bar. Sondyqtan oblys boıynsha 1-shi maýsym balalar kúninen bastap kópbalaly jáne jaǵdaıy tómen otbasylar, basqa da kezekte turǵan turǵyndarǵa baspana berile bastaıdy», - dedi Almaty oblysy ákiminiń orynbasary Aqan Abdýalıev.
Aıta keteıik, Almaty oblysynyń ákimdigi «7-20-25» baǵdarlamasy boıynsha baspanaly bolamyn degen kópbalaly otbasylardyń alǵashqy jarnasyn tóleýdi de qolǵa aldy. Osylaısha quny 1 mln teńge bolatyn turǵyn úı sertıfıkatyn berýdi bastady. Al sertıfıkattyń jıyntyq qory 300 mln teńge. Demek, 300 otbasynyń alǵashqy jarnasyn tóleýge ákimdik qol ushyn berýde.
Jalpy Almaty oblysynda kópbalaly 40 myńǵa jýyq otbasy bar. Eki-úsh aıdyń tóńireginde ǵana kásipkerler men jany jomart jandar 60 kópbalaly anaǵa baspana syılady. Igi bastama áli jalǵasyn tabýda.
Sondaı-aq, oblysta kópbalaly jáne jaǵdaıy tómen otbasylardyń balalaryn ákimniń tegin bilim grantymen qamtamasyz etý, oqýshylaryn tegin tamaqtandyrý, tegin qoǵamdyq kólikpen júrý, tabıǵı gazǵa qosylýǵa jeńildik jasaý, órt qaýipsizdiginen saqtandyrý qurylǵylaryn tegin ornatý syndy kóptegen jumystar atqarylýda.
Esterińizge sala keteıik, 1 sáýirden bastap taldyqorǵandyq kópbalaly analar qoǵamdyq kólikte tegin júre bastady. Jalpy Almaty oblysynyń ortalyǵynda 4 jáne odan da kóp balasy bar 2500-ge jýyq ana tirkelgen.