Kópbalaly analar qaraǵandylyq dárigerlerge túski as ázirlep berýde

QARAǴANDY. QazAqparat - «Asyl ana» jáne «Ana-Mama» qoǵamdyq birlestikterinń qataryndaǵy kópbalaly analar jedel járdem feldsherleri men provızorlyq gospıtal dárigerleri úshin ystyq as daıyndady. Osylaısha olar kómek kórsetken adamdarǵa, TJ kezinde qoldaý bildirgen memleketke alǵysyn bildirmekshi, dep habarlaıdy QazAqparat tilshisi.

«Asyl ana» kópbalaly analar birlestiginiń tóraıymy Aıjan Baıdildınova medıtsına qyzmetkerlerine kómek kórsetý týraly sheshimge áıelderdiń qalaı kelgenin aıtyp berdi.

«Barlyǵy ottegi kontsentratoryn satyp alýǵa erikti aqsha jınaý týraly habarlandyrýdy kórgenimizden bastaldy. Bastapqyda bizge apparat 170 myń teńge turatynyn aıtty. Biz, 300 ana, birlese otyryp, 176 myńnan sál artyq jınadyq. Biraq keıin bizge kólik máselesi sheshilgendikten apparattardyń baǵasy tómendegenin aıtty. Ottegi kontsentratoryn biz 105 myń teńgege aldyq. Qalǵan qarajatty qaıda jumsaıtynymyzdy biz birlesip sheshtik», - dep esine alady Aıjan Baıdildınova.

Ystyq túski as daıyndaý ıdeıasy «Ana-Mama» qoǵamdyq qorynda paıda boldy. Nátıjesinde «Asyl Ana» men «Ana-Mama» birlesp, iske kiristi. Olarǵa «Kúngeı» yqsham aýdanyndaǵy kópbalaly otbasylar qosyldy. Al qalǵan qarajatqa olar eki qoı men qajetti azyq-túlik satyp aldy.

«Kývskaıa kóshesindegi meshit janyndaǵy medirese ashanasynda daıyndap jatyrmyz. Biz osy vırýspen kúreste, oryn alyp otyrǵan jaǵdaıda bárimiz birge ekenimizdi kórsetkimiz keledi. Qazir bizde kópbalaly analarǵa – qala jáne oblys ákimdikterine, Densaýlyq saqtaý basqarmasyna, «Nur Otan» partııasyna jáne basqalaryna alǵys aıtý múmkindigi týdy. Árıne, indetpen kureste aldyńǵy shepte júrgen dárigerlerimizge kómekteskimiz keledi», - deıdi Aıjan Baıdildınova.

Ár túrli qoǵamdyq qorlardaǵy analar kezektesip as daıyndaıdy. Olar kompot men ystyq taǵam, toqash men baýyrsaq pisiredi. Kúndelikti pisirilgen ystyq tamaq jedel járdem stansasyna jáne provızorlyq gospıtalderge jetkiziledi. Kún saıyn kópbalaly qaraǵandylyqtar daıyndaǵan taǵammen 270 dáriger aýqattanady.

«Bilesizder me, buǵan sený qıyn, árıne, biraq baýyrsaqty alǵash ret gospıtalge ákelgen kezde dárigerlerdiń biri jylap jiberdi. Olar 15 kún nemese tipti bir aı boıy týystaryn, úı taǵamyn kórmepti. 12-14 saǵat tik turyp, jumys isteýde. Olar úshin bul tek dámdi tamaq qana emes, qoldaýdyń baryn seziný. Aq halattylar jaqyndarymyzdyń ómirin qutqarǵan qıyn kezeńde, biz olarǵa qamqorlyq jasaıtyn bolamyz», - dep atap ótti «Asyl Ana» qorynyń tóraıymy.

Kópbalaly analar dárigerler úshin ystyq túski asty bir apta boıy daıyndap keledi.