Kópbalaly analar 171 mlrd teńge kóleminde járdemaqy aldy –mınıstrlik

NUR-SULTAN. QazAqparat - Jyl basynan beri kópbalaly analar 171,2 mlrd teńge kóleminde járdemaqy aldy. Bul týraly QazAqparat tilshisi Eńbek mınıstrliginiń baspasóz qyzmetine silteme jasap habarlaıdy.

Vedomstvonyń habarlaýynsha, bıylǵy jyldyń qańtar-qyrkúıek aralyǵynda jalpy somasy 171,2 mlrd teńgege 386,6 myń otbasy kópbalaly otbasylarǵa arnalǵan memlekettik járdemaqymen qamtyldy. Qyrkúıek aıynda osy járdemaqy túrin jalpy somasy 17,9 mlrd teńgege 359,6 myń otbasy aldy.

Atalǵan memlekettik járdemaqyǵa 4 jáne odan kóp birge turatyn kámeletke tolmaǵan nemese kúndizgi bólimde oqıtyn 23 jasqa deıingi stýdent balalary bar otbasylar tabysyna qaramastan úmitker bola alady. Tólem mólsheri balalardyń sanyna baılanysty 44 532 teńgeden (4 bala) 77 951 teńgege (7 bala) deıin, 8 jáne odan keıingi ár balaǵa 4 AEK-ten saralanǵan.

Osylaısha, osy járdemaqynyń ulǵaıýy 8 jáne odan da kóp balasy bar otbasylar úshin jeke mólsherdi belgileý arqyly qamtamasyz etildi. Tıisti zańǵa Memleket basshysy aǵymdaǵy jylǵy 13 mamyrda qol qoıdy.

8 balasy bar otbasy úshin járdemaqy 88 896 teńgeni quraıdy, 9 balaǵa – 100 008 teńge, 10 – 111 120 teńge, 11 - 122 232 teńge, 12 – 133 344 teńge, 13 – 144 456 teńge, 14 – 155 568 teńge, 15 - 166 680 teńge, 16 – 177 792 teńge tólenedi.