Kópbalaly ana Jambyl oblysynda tigin sheberhanasyn ashty
Eńbek jáne halyqty áleýmettik qorǵaý mınıstrliginiń málimetinshe, Aıda Aqylbekova jeti bala tárbıelep otyr. Kópbalaly ana memleket tarapynan qoldaý bolý kerek, biraq únemi áleýmettik kómek alǵansha, óz bıznesiniń bolǵany jaqsy dep esepteıdi.
«Meniń oıymsha, ómirde kez-kelgen mamandyq qajet bolýy múmkin, sondyqtan 25 jasymnan bastap qurylysshy-montajshydan aspazshy mamandyǵyna deıin túrli kýrstarda oqydym. Qolymnan barlyq derlik nárse keledi dep batyl aıta alamyn. Úıde jóndeý jumystaryn da jasaı alamyn, shashty da ádemilep qysqarta alamyn, asty da dámdi pisiremin. AÁK alǵannan keıin qysqa merzimdi kýrstarda tiginshi mamandyǵyn aldym. Qazir ulttyq stılde kórpe tigý múlde qıyn emes. Memlekettik grant boıynsha alǵan aqshaǵa tigin mashınasyn, útik, útikteý taqtasy men as pisiretin kásibı pesh satyp aldym. Qazir jańa týǵan nárestelerge arnalǵan kıim tigý boıynsha tapsyrystar qabyldaımyn. Qysta mektep ashanalaryna arnap túrli toqashtar pisirýdi josparlap otyrmyn. Óz bıznesimdi amalsyzdan úıde júrgizip kelemin, sebebi kenje balam áli kishkentaı», – dep kópbalaly bıznesvýmen.
Jambyl oblysynyń Jumyspen qamtýdy úılestirý jáne áleýmettik baǵdarlamalar basqarmasynyń aqparaty boıynsha, Aıda Aqylbekovaǵa aı saıyn 163 myń 826 teńge kóleminde jalpy somasy 1 mln 965 myń 912 teńge ataýly áleýmettik kómek taǵaıyndaldy. Óńir boıynsha AÁK barlyǵy 35 myń 497 otbasyna taǵaıyndaldy, oǵan 14,5 mlrd teńge kóleminde qarajat jumsaldy.
«Búgingi tańda 1 myń 535 adam turaqty jumys oryndaryna ornalastyryldy, 51 adam jeke isin ashty, 164 adam biliktiligin arttyrý, qaıta daıarlaý jáne qaıta oqytý kýrstaryna jiberildi, 879 adam qoǵamdyq jumystarǵa, 242 adam áleýmettik jumys oryndaryna ornalastyrylyp, 63 adam jastar praktıkasyna jiberildi», – dep habarlady óńirlik jumyspen qamtýdy úılestirý basqarmasynyń basshysy Tımýrjan Nurymbetov.
Esterińizge sala keteıik, aǵymdaǵy jylǵy toǵyz aıda AÁK 417 myń otbasyna nemese 2,1 mln adamǵa taǵaıyndaldy. AÁK ortasha mólsheri bir adamǵa 2,5 ese, 6848 teńgeden 16 446 teńgege deıin ósti. Ortasha eseppen otbasyna 90 myń teńge shyǵady, aıyna eń kóp taǵaıyndalǵan soma – 455 myń teńge. Aǵymdaǵy jyly AÁK-ke 206,2 mlrd teńge qarastyrylǵan, onyń 146,4 mlrd teńgesi tólendi.
Budan buryn habarlanǵandaı, aǵymdaǵy jylǵy 7 qazanda QR Úkimeti otyrysynda Eńbek jáne halyqty áleýmettik qorǵaý mınıstri Birjan Nurymbetov Qazaqstanda 2020 jylǵy 1 qańtardan bastap engizý josparlanyp otyrǵan AÁK kórsetýdiń jańa tetikterin tanystyrǵan bolatyn.
«Eń basty prıntsıp – memleket shyn máninde kómekke muqtaj adamdarǵa, birinshi kezekte balalar men kópbalaly otbasylarǵa kómektesedi! Eńbekke qabiletti azamattar jumys isteýi kerek. Memleket jumysqa ornalastyrýǵa nemese shaǵyn bıznespen aınalysýǵa kómektesedi. Memlekettik kómekke – kópbalaly otbasylardy qoldaý, tabysy tómen otbasylarǵa ataýly áleýmettik kómek kórsetý, tabysy az otbasylardaǵy balalarǵa kepildendirilgen áleýmettik paket berý kiredi», – dedi Birjan Nurymbetov.
Mınıstrdiń aıtýynsha, kópbalaly otbasylarǵa qoldaý kórsetý respýblıkalyq bıýdjetten memlekettik járdemaqylar engizý arqyly qamtamasyz etiletin bolady. Bul memlekettik járdemaqy barlyq kópbalaly otbasylarǵa (4 nemese odan da kóp kámeletke tolmaǵan balasy bar) tabysyna qaramastan tólenedi.