Kópbalaly ana Memleket basshysynan Shyǵarmashylyq úıin salyp berýdi ótindi

EKІBASTUZ. QazAqparat – Prezıdent Qasym-Jomart Toqaev Ekibastuz qalasyndaǵy jylý elektr ortalyǵynyń jaǵdaıymen tanysqan soń jergilikti turǵyndarmen áńgimelesti, dep habarlaıdy QazAqparat.

Aqordanyń baspasóz qyzmetinen málim etkendeı, qala turǵyndary úılerin jylýmen qamtamasyz etýdiń mán-jaıy týraly aıtty.

Memleket basshysy qıyn-qystaý jaǵdaıda shydamdylyq tanytqany jáne apat saldaryn joıý kezinde azamattyq belsendilik kórsetkeni úshin ekibastuzdyqtarǵa alǵys bildirdi.

«Ekibastuzǵa ahýaldy kórý úshin arnaıy kelip otyrmyn. Ótken qys ońaı bolǵan joq. Bárin kórdim, túsinemin. Degenmen bárimiz bir ult, bir el retinde aýyzbirshilik tanytýymyz kerek. Qala turǵyndary osy qıyn jaǵdaıda sabyrlyq tanytyp, shydady. Azamattyq pozıtsııasyn, kózqarasyn bildirdi. Sondyqtan barshańyzǵa rızashylyǵymdy bildiremin. Úkimetke tıisti tapsyrmalar berildi. Tıisti qarajat bólindi. Sondyqtan bári oıdaǵydaı bolady dep oılaımyn», – dedi Prezıdent.

Qasym-Jomart Toqaev byltyrǵy tótenshe jaǵdaı qaıtalanbaýy úshin Úkimet tarapynan barlyq qajetti sharalar qabyldanyp jatqanyn málimdedi.

Sonymen qatar turǵyndar memleket tarapynan kórsetilip jatqan qoldaý úshin alǵys aıtyp, Prezıdentten qalany abattandyrý jáne áleýmettik nysandar salý máselesin kóterdi. Atap aıtqanda, Ekibastuz qalalyq ardagerler keńesiniń tóraǵasy Samat Ramazanov «Shahter» saıabaǵyna kúrdeli jóndeý júrgizý qajet ekenin aıtty. Al kópbalaly ana Aıana Smaǵulova qalada balalardyń bos ýaqytyn tıimdi ótkizip, olardyń jan-jaqty damýyna arnalǵan Shyǵarmashylyq úıin salyp berýdi surady.

Memleket basshysy turǵyndardyń ótinishterin nazarǵa alyp, tıisti tapsyrma beretinin jetkizdi.

«Durys aıtasyz. Nazarǵa alamyz. Qysqa ýaqyt ishinde Shyǵarmashylyq saraıyn salamyz. Jalpy, bizge el kóleminde óskeleń urpaqqa qyzmet etetin nysandardy kóbirek salý kerek. Sportpen aınalysý kerek ekenin aıtyp júrmin ǵoı. Balalalardy sportqa baýlý kerek. Biraq ol úshin laıyqty sport alańdary, stadıondar qajet. Tipti, ondaı sport nysandary elordada da jetispeıdi. Sondyqtan ákimder bul máselemen mindetti túrde aınalysýy kerek», –dedi Qasym-Jomart Toqaev.

Eske salaıyq, búgin Prezıdent Q.Toqaev jumys saparymen Pavlodar oblysyna bardy.

Memleket basshysy Ekibastuzdaǵy jylý elektr ortalyǵynda júrgizilip jatqan jóndeý jumystarymen tanysty.

Premer-Mınıstrdiń birinshi orynbasary Roman Sklıar Ekibastuz qalasyndaǵy jylýmen qamtý júıesin jańǵyrtýǵa Úkimet tarapynan kórsetilgen qoldaý sharalary týraly baıandady.

Eske salsaq, byltyr 27 qarashada Ekibastuz JEO-da birneshe qazandyq isten shyǵyp, qala jylýsyz qalǵan edi.