Kópbalaly, turmysy tómen otbasylardan shyqqan 80 bala áskerı mektepti aıaqtady

<p>ASTANA. KAZINFORM &ndash; Qazaq áskeriniń elıtaly ókilderin daıyndaıtyn &laquo;Arystan&raquo; mamandandyrylǵan lıtseıi bıyl óz túlekteriniń 12 býynyn qanattandyrdy. Bul lıtseıde elimizdiń ár óńirinen kelgen 240 oqýshy bilim alady. Oıy ozyq, jigerli jastardy irikteıtin oqý ordasynan bıyl 80 kýrsant úlken ómirge qanat qaqpaq.&nbsp;</p>

Merekelik is-shara túlekterdiń sapqa turyp, lıtseıdiń týyn alyp kirý rásiminen bastaldy. Týdyń ózi oqý ornynyń bedelin, dańqyn, oqý ordasynyń dástúrlerin, ásirese bilim berý mekemesiniń áskerı daıyndyq baǵytynda bilim beretinin aıǵaqtaıdy. 

«Arystan» lıtseıi kýrsanttardyń ınternatta jatýyn, tegin bilim alýy men oqýǵa qajetti kerek-jaraqtyń barlyǵymen qamtamasyz etýin áleýmettik maqsaty dep tanıdy. Sondyqtan oqýǵa qabyldaý kezinde az qamtylǵan jáne kópbalaly otbasylardan shyqqan balalardy qabyldaýǵa basymdyq beredi. 

«Osy kıeli shańyraqtyń túlegi bolǵanymdy maqtan turamyn. Sebebi munda tek bilimdi, belsendi oqýshylar qabyldanady. Lıtseıge túsý úshin birneshe jyl daıyndaldym. Bul bilim ordasy týraly ınternetten kórdim. Áskerı bilim ordalarynyń ishindegi eń bedeldisi ekenin bilgen soń birden bilimimdi shyńdaı bastadym. Atalǵan oqý orynynda júrip elime, jerime, Otanyma degen patrıottyq sezimdi tereń boıyma sińirdim. Alǵan bilimimniń arqasynda elimizdiń damýyna úles qosamyn dep oılaımyn», - deıdi «SOS Almaty balalar qalashyǵynyń» tárbıelenýshisi. 

«Arystan» lıtseıi – joǵary halyqaralyq talaptarǵa saı keletin, bedeldi bilim ordasy. Jyl saıyn lıtseıge túsý úshin 10-12 oqýshy 1 orynǵa talasady. Olardyń ishinde bilim men densaýlyq jaǵynan tapsyrylatyn kóp satyly synaqtardan súrinbeı ótkenderi ǵana oqýǵa qabyldanady. 

Qor dırektorynyń aıtýynsha, lıtseı qurylǵaly beri 900-den asa túlek ushyp shyqty. Bıyl 80 kýrsant úlken ómirge joldama aldy. 

«Kýrsanttar ınternatta jatyp tegin bilim alady. Olar barlyq kerek-jaraqpen qamtamasyz etiledi. Lıtseıdiń qabyrǵasynan ushqan túlekterdiń elimizdiń bedeldi joǵary oqý oryndarynda oqýyn jalǵastyrýynyń ózi bilim ordasynyń sapa kórsetkishin bildiredi. Búginde túlekterdiń keıbiri Іshki ister mınıstrliginde, Ulttyq ulan qatarynda, Ulttyq qaýipsizdik komıteti quramynda, Shekara qyzmetinde, Tótenshe jaǵdaılar mınıstrligi men Memlekettik kúzet qyzmeti sııaqty ártúrli kúsh qurylymdarda qyzmet etýde», - dedi Saǵynbek Shýnkeev.

Túlekterge arnalǵan saltanatty jıynda lıtseı bastyǵy – general-leıtenant Murat Jáleluly Maıkeev oqý jylyn qorytyndylady. Túlekterdi quttyqtap, attestat, tósbelgiler men syılyqtar tabystady.