Kóp jaǵdaıda 30-49 jas aralyǵyndaǵy er adamdar joǵalady- zertteý

NUR-SULTAN. QazAqparat – Búginde habar-osharsyz joǵalǵan 2 247 adam izdestirilýde. Bul týraly QazAqparat QR Bas prokýratýrasy Quqyqtyq statıstıka jáne arnaıy esepke alý jónindegi komıtetine silteme jasap habarlaıdy.

«Qazirgi ýaqytta 11 133 adamǵa izdeý salynǵan, onyń 2 247-si habar-osharsyz joǵalǵandar. Eń kóp habar-osharsyz joǵalǵandar Almaty qalasy (328), Shyǵys Qazaqstan (221), Almaty (309) jáne Qaraǵandy oblystarynda (221). 30-49 jas aralyǵynda ártúrli jaǵdaılarmen kóbinese jıi er adamdar (76%) joǵalady», - delingen Komıtet habarlamasynda.

Taratylǵan málimetke qaraǵanda, úıinen ketip oralmaǵandar – 1723, avtokólikpen joǵalǵandar – 74, jumystan ketkender – 36.

«Sonymen birge, elimizde tergeýden jáne sottan jasyrynǵan 2 453 adamǵa, ıaǵnı eń kóbi alaıaqtyq (451), urlyq jasaý (270) jáne kisi óltirgeni (166) úshin Almaty qalasy (463), Almaty (245) jáne Shyǵys Qazaqstan oblystarynda (203) izdeý salynǵan. Olar negizinen 31-40 jas aralyǵyndaǵy er adamdar (89%)», - dep atalyp ótken komıtet aqparatynda.

Aıta keteıik, Qazaqstanda izdeý salýdy ishki ister, ulttyq qaýipsizdik, qorǵanys organdary, ekonomıkalyq tergeý júrgizý, memlekettik kúzet jáne sybaılas jemqorlyqqa qarsy qyzmetteri júzege asyrady. Barlyq izdeý isterin tirkeý, sonymen qatar memleketaralyq aqparattar bankimen ózara baılanys jasaýdy QR Bas prokýratýrasynyń Quqyqtyq statıstıka jáne arnaıy esepke alý jónindegi komıteti júzege asyrady.