Kóp sportshy dopıngti ádeıi emes, bilmegendikten qabyldaýy múmkin – komıtet

NUR-SULTAN. QazAqparat – Qazaqstanda dopıng daýyna ushyrap jatatyn sportshylardyń deni ony bilmeı qabyldaýy múmkin. Bul pikirdi QR Mádenıet jáne sport mınıstrligi sport jáne dene shynyqtyrý komıteti tóraǵasynyń orynbasary Aıgúl Bektenova alǵa tartyp otyr, dep habarlaıdy QazAqparat tilshisi.

«Elimizde sport salasynda dopıngke múldem tózbeýshilik saıasaty júretinin eske salǵym keledi. 2019 jyly biz dopıngpen kúresý maqsatynda arnaıy zań qabyldap, jaýapkershilik qatańdady. Atalǵan zańda 2 normatıv bar. Birinshi, ol sportshynyń dopıng erejesin buzý normatıvi, ekinshi - dopıng anyqtalǵan jaǵdaıda sportshynyń jarysta kórsetken nátıjesi men jetistigin joqqa shyǵarý»,- dedi Aıgúl Bektenova ortalyq kommýnıkatsııalar qyzmeti alańynda ótken baspasóz máslıhatynda.

Mınıstrlik ókiliniń málimdeýinshe, jarysta jeńiske jetken sportshydan dopıng qoldanǵany anyqtalsa, ol berilgen syı-syıapat pen ataq-dárejeni keri qaıtarady.

«Jeńiske jetken sportshyǵa medaldan bólek, chempıondyq tıtýl, qarjylaı jáne múlikteı syıaqy beriledi. Eger keıin sportshy dopıng daýyna ushyrap, ol dáleldense, joǵary atalǵan syı-qurmetti keri qaıtarýǵa mindetti. Osylaısha, biz dopıng daýynyń aldyn alyp otyrmyz. Sonymen qatar, elimizde dopıngke qarsy ulttyq ortalyq jumys isteıdi. Ol jerde sportshylardy dopıngke qarsy testileýden ótkizip qana qoımaı, sporshylar men jattyqtyrýshylar arasynda onyń aldyn alýǵa qatysty arnaıy dáris, semınarlar ótkiziledi. Sebebi kóptegen sportshy dopıngti ádeıi emes, bilmegendikten qabyldaýy múmkin. Óıtkeni, keıbir tyıym salynbaǵan preparattar quramynda dopıngtiń elementi bolýy yqtımal», - deıdi ol.

Aıta keteıik, buǵan deıin komıtet basshysy el óńirlerinde sport quramalarynyń daıyndyǵy beı-bereket júrip jatqanyn aıtty.