Mınıstrlerdiń 90 paıyzynyń taǵaıyndalǵanyna kóp bolǵan joq, jumys nátıjesin kórip úlgermedik — depýtat

<p>ASTANA. KAZINFORM — Májilistegi Respublica partııasynyń fraktsııasynyń jetekshisi, depýtat Aıdarbek Qojanazarov jańa Premer-Mınıstrdiń taǵaıyndalýy men Mınıstrler kabınetiniń múshelerine qatysty pikir bildirdi.</p>

«Meniń oıymsha, Mınıstrler kabıneti músheleri arasynda 90 paıyzynyń kelgenine jarty jyl bolmady. Osy az ýaqyt aralyǵynda olardyń jumys nátıjesin kórip úlgermedik. Sondyqtan bizdiń partııanyń aldynda bul mınıstrlerdiń bárin aýtsaıder dep sanaımyz. Sebebi Úkimet jumysynda olar naqty nátıjesin kórsetpedi. Biz birneshe márte suraq qoıǵan edik, sol kezde olar „jumys nátıjesin kórsetýge ýaqyt kerek“ degen ýáj aıtty. ıAǵnı josparlardy júıelep alýǵa ýaqyt surady», — dedi A. Qojanazarov Májilistiń jalpy otyrysynan keıin tilshiler suraǵyna jaýap bere otyryp. 

Onyń paıymynsha, jańa Úkimet quramynda qarjy blogy ózgerýi tıis. 

«Qarjy mınıstrligi men Ulttyq ekonomıka mınıstrliginiń saıasaty burynǵy Premer-Mınıstr Álıhan Smaıylovtyń júrgizgen baǵytyna saı bolǵannan keıin  atalǵan eki mınıstrlikte ózgeris bolýy kerek», — dedi depýtat.

Sonymen qatar ol jańa Úkimet basshysyna qatysty pikir bildirdi.

«Oljas Bektenov óńirde qyzmet etti. Jergilikti atqarýshy organdar qalaı jumys isteıtinin biledi. Ony keńsede nemese kabınette ǵana otyrǵan adam dep aıtýǵa kelmeıdi. Sybaılas jemqorlyqqa qarsy is-qımyl agenttigin basqarǵannan keıin, onyń osy ekonomıkalyq júıede, sondaı-aq jemqorlyqqa qarsy qyzmete tájirıbesi bar. Osyny eskere otyryp Respublica partııasy Bektenovti qoldady», — dedi A. Qojanazarov.

Budan buryn habarlanǵandaı, búgin Memleket basshysy Qasym-Jomart Toqaev Úkimettiń qarjy-ekonomıkalyq blogy ózgeretinin aıtty.